ಇರುವಾಗ ಕರೆದು ಕೊಡು

ವ್ಯಯದ ಬೆಂಕಿಯು ಬಿಡದೆ
ಸಂಚಿತಾರ್ಥವ ಸುಡವು
ದಿದಕೆ ಚಿಂತೆಯೆ ಮನವೆ
ಸಂತಪಿಸುವೇಕೆ ?!
ಆಯು ತೀರಿದ ಬಳಿಕ
ವ್ಯಥೆಗೊಂಡೊಡೇನು ಫಲ ?!
ಇರುವಾಗ ಕರೆದು ಕೊಡು
ಜಾಣಮೂರ್ಖ//

ಸ್ನೇಹಿತರೇ , ಸ್ವಲ್ಪ ಸೂಕ್ಷ್ಮವಾಗಿ ಚಿಂತಿಸಿ! ನೀವು ಕೂಡಿಟ್ಟ ಹಣ ಎಷ್ಟೇ ಇರಲಿ ,ಅದು ನಿಮ್ಮದಲ್ಲ. ವ್ಯಯ ಮಾಡಲೇ ಬೇಕು. ಇಲ್ಲದಿದ್ದರೆ ಬಚ್ಚಿಟ್ಟಿದ್ದು ಪರರಿಂಗೆ ಎನ್ನುವರಲ್ಲಾ ! ಹಾಗೆ ಬೇರೆ ಯಾರದೋ ಪಾಲಾಗಿಬಿಡುತ್ತದೆ ಅಷ್ಟೆ. ಅಯ್ಯೋ ಖರ್ಚಾಗುತ್ತಿದೆಯಲ್ಲಾ ! ಎಂದು ದುಃಖಪಟ್ಟರೆ ಅದಕ್ಕೆ ಅರ್ಥವಿದೆಯೇ ? ಆಯಸ್ಸು ತೀರಿದ ಮೇಲೆ ಪಶ್ಚಾತ್ತಾಪ ಪಟ್ಟರೆ ಏನು ಫಲವಯ್ಯಾ ಗೆಳೆಯ ? ರೈಲು ಹೋದಮೇಲೆ ಟಕೀಟು ಪಡೆದಂತೆ. ಅದಕ್ಕೇ ಇರುವಾಗ ನೀನೂ ಬಳಸಿ ಸ್ವಲ್ಪವನ್ನಾದರೂ ಸತ್ಪಾತ್ರರಿಗೆ ನೀಡು. ಅದರಿಂದ ಸಿಗುವ ಆನಂದವೇ ಬೇರೆ. ಅಚ್ಚರಿಯ ಮಾತೊಂದನ್ನು ಹೇಳುತ್ತೇನೆ ಕೇಳಿ ಗೆಳೆಯರೇ -“ಇರುವಾಗ ಕರೆದು ಕೊಡದಿದ್ದರೆ ಮುಂದೆ ಕೊಡುವ ಮನ ಬಂದರೂ ಪಡೆವವರು ಸಿಗರು !” ಭಗವಂತನು ಅವಕಾಶವನ್ನು ಕೊಟ್ಟು ನೋಡುತ್ತಾನೆ. ಆಗ ನಾವು ಹೇಗೆ ವರ್ತಿಸುತ್ತೇವೋ ಅದೇ ನಮ್ಮ ಮೂಲ ಗುಣ. ಉಳಿದುದೆಲ್ಲಾ ಹಾಗೇ ಸುಮ್ಮನೆ ಅಷ್ಟೆ.

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)