ಒಳಿತ ಕೇಳೊಳಿತ ಕಾ
ಣೊಳಿತ ಗೈಯೊಳಿತ ನುಡಿ
ಯೊಳಿತೊಳಿತು ಸೇರೆ ಬಾಳ್
ಕಳಿವುದೋ ಕೆಳೆಯ !
ಬಾಳ ಬಟ್ಟೆಯ ಭಾವ
ತೊಳೆದು ಹಸನಾಗಿಪುದು
ಸುಳಿ ಕಳೆವುದಾಗ ತಿಳಿ
ಜಾಣಮೂರ್ಖ //
ಈ ಮುಕ್ತಕವನ್ನು ಒಳ್ಳೆಯ ನಾಲಿಗೆಯ ತಿರುವಾಗಿ(Tongue Twister) ಬಳಕೆ ಮಾಡಬಹುದು. ಮೊದಲ ನಾಲ್ಕು ಸಾಲುಗಳನ್ನು ನಿಲ್ಲಿಸದೇ ಓದಿರಿ ಗೆಳೆಯರೇ ಅದರ ಸೊಗಸು ನಿಮಗೇ ತಿಳಿಯುತ್ತದೆ. ಇನ್ನು ಇದರ ತಾತ್ಪರ್ಯ ಹೀಗಿದೆ. ಒಳ್ಳೆಯದನ್ನೇ ಕೇಳು , ಎಲ್ಲದರಲ್ಲೂ ಒಳ್ಳೆಯದನ್ನೇ ಕಾಣು, ಒಳ್ಳೆಯ ಕೆಲಸಗಳನ್ನೇ ಮಾಡು , ಒಳ್ಳೆಯ ಮಾತುಗಳನ್ನೇ ಆಡು ಹೀಗೆ ಒಳಿತು ಒಳಿತುಗಳೇ ಸೇರಿ ಬಾಳು ಕಳಿತು ಮಾಗುತ್ತದೆಯಯ್ಯಾ ಗೆಳೆಯಾ. ಇದರಿಂದ ಬಾಳ ದಾರಿಯು ಸುಗಮವಾಗುತ್ತದೆ. ಮನದ ಭಾವವು ಒಳಿತಿನ ಸಿಂಚನದಿಂದ ತೊಳೆಯಲ್ಪಟ್ಟು ಹಸನಾಗುತ್ತದೆ. ಬದುಕಿನ ಸುಳಿಗಳಲ್ಲಿ ಸಿಲುಕಿ ನರಳುವುದು ತಪ್ಪುತ್ತದೆಯಲ್ಲದೇ ಜೀವನದಲ್ಲಿ ಶಾಂತಿ ನೆಮ್ಮದಿಗಳು ನೆಲೆಸುತ್ತವೆ. ಬದುಕು ಸುಂದರ ಹಾಗೂ ಅರ್ಥಪೂರ್ಣವಾಗಿರುತ್ತದೆ. ಏನಂತೀರಿ ?
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
