ಬಾಳ ಗುರಿಗಿರೆ ಬೆಲೆಯು
ಬದುಕಿಗಿದೆ ಬೆಲೆಯು ತಾಂ
ಬೆಲೆಯ ಮೀರಿದ ಸತ್ಯ
ಗುರಿಯಾಗೆ ಧನ್ಯ !
ಜಗದ ಮೂಲಕೆ ಮಣಿಯೊ
ನಿಷ್ಕಾಮ ಭಕ್ತಿಯೊಳ
ಗಿದಕಿಂತ ಗುರಿಯೇನೊ
ಜಾಣಮೂರ್ಖ//
ಉತ್ತಮ ಗುರಿಯಿದ್ದರೆ ಈ ಬದುಕಿಗೆ ಬೆಲೆಯು ತಾನಾಗಿಯೇ ಬರುತ್ತದೆ. ಮನುಷ್ಯ ಎಲ್ಲಕ್ಕೂ ಬೆಲೆ ಕಟ್ಟಿಬಿಟ್ಟಿದ್ದಾನೆ. ಭೂಮಿಯನ್ನೇ ಬಿಟ್ಟಿಲ್ಲ !! ಚದುರ ಅಡಿಗೆ ಇಷ್ಟೆಂದು ಲೆಕ್ಕ ಹಾಕುವ ಈ ಮಿಥ್ಯ ಪರಿಪಾಟಕ್ಕೆ ಏನೆನ್ನಬೇಕು ! ಆದರೆ ಬೆಲೆಕಟ್ಟಲಾಗದ ಸತ್ಯವೇ ಗುರಿಯಾದಾಗ ಬದುಕಿಗೊಂದು ಸುಂದರ ಮೆರುಗಿದೆ, ಅಂತಹಾ ಜೀವನವೇ ಧನ್ಯ ಕಣಯ್ಯ ಗೆಳೆಯ. ಬದುಕಿನ ಪ್ರತಿಹೆಜ್ಜೆಯಲ್ಲೂ ಮುಂದೆ ಬಂದೊದಗಬಹುದಾದ ಕಷ್ಟಗಳ ಬಗ್ಗೆ ಚಿಂತಿಸಿ, ಅರಿತು ಅಡಿಯಿಡಬೇಕು. ಈ ಜಗತ್ತಿನ ಅಸ್ತಿತ್ವಕ್ಕೆ ಮೂಲವಾವುದೆಂಬ ಪರಮಸತ್ಯವನ್ನು ಅರಿತು ನಿಷ್ಕಾಮ ಭಕ್ತಿಯಿಂದ ಆ ದಿವ್ಯ ಭವ್ಯ ಶಕ್ತಿಗೆ ಮಣಿಯಬೇಕು. ಆಗ ಸಹಜವಾಗಿಯೇ ನಮ್ಮಲ್ಲಿ ನಿರ್ಮೋಹ , ನಿರ್ಲಿಪ್ತತೆ , ನಿಷ್ಕಾಮತ್ವಗಳು ಉಂಟಾಗುತ್ತವೆ. ಇದಕ್ಕಿಂತಲೂ ಸಂತಸದ ಬದುಕುಂಟೆ !?
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
