ಬಾಳ ಬಾಧೆಯ ಮೂಲ

ಬದುಕನೀಸುವ ಭರದೊ
ಳೆದುರಾಗೊ ಗೊಂದಲಂ
ಗಳ ಕಳೆದು ಮತ್ತದರೊ
ಳೇಂ ಕೆಡೆವೆ ಕೆಳೆಯ !?
ಬಾಳ ಬಾಧೆಯ ಮೂಲ
ಒಂದೆ ತಾನಿರುತಿರಲು
ಕೆಡೆದಲ್ಲೆ ಕೆಡೆವೇಕೊ
ಜಾಣಮೂರ್ಖ //

ಮಾಯೆ ಮುಸುಕಿದ ಈ ಬದುಕಿನ ಪರಿಯೇ ಒಂದು ರೀತಿ ಬಹು ವಿಚಿತ್ರ. ಈಗ ನಮ್ಮನ್ನೇ ನೋಡಿ. ಬದುಕನ್ನು ಯಶಸ್ವಿಯಾಗಿ ಈಸಬೇಕೆನ್ನುವ ಭರದಲ್ಲಿ ಗೊಂದಲದ ಗೂಡಾಗುತ್ತೇವೆ. ಸರಿ ಹೇಗೋ ನಿಭಾಯಿಸಿಕೊಂಡರೂ ಮತ್ತೆ ಅದರಲ್ಲೇ ಬೀಳುತ್ತೇವೆ. ಎಲ್ಲರೂ ದೈವ ಭಕ್ತರೇ ಆದರೂ ಅವನ ದಿವ್ಯವಾದ ಅಂತಃಸತ್ವವನ್ನು , ತತ್ತ್ವವನ್ನು ಅರಿಯದಿರುವುದು ಮಾತ್ರ ಒಂದು ದೊಡ್ಡ ವಿಪರ್ಯಾಸ. ಬಾಳ ಬಾಧೆಯ ಮೂಲವು ಮಾತ್ರ ಒಂದೆ. ಏನದು ? ಬೇಕಾದುದನ್ನು ಪಡೆಯಬೇಕೆಂಬುದು. ಅದಕ್ಕಾಗಿ ಏನೆಲ್ಲಾ ಹರಸಾಹಸ !? ಏನೆಲ್ಲಾ ಗೊಂದಲ ! ಬಿದ್ದ ಜಾಗದಲ್ಲೇ ಮತ್ತೆ ಮತ್ತೆ ಬೀಳ್ವ ಪರಿ !? ಒಂದು ಅಚ್ಚರಿಯೆಂದರೆ ಶಾಂತವಾಗಿದ್ದರೆ ಎಲ್ಲವೂ ಸಿಗುತ್ತದೆ. ಆದರೆ ಬಯಸಿದ್ದು ಇಂದೇ , ಈಗಲೇ ಸಿಕ್ಕಿಬಿಡಬೇಕೆನ್ನು ನಮ್ಮ ಹಪಹಪಿಕೆ ನಮ್ಮನ್ನು ಇಂತಹಾ ಗೊಂದಲಗಳಿಗೆ, ತೊಂದರೆಗಳಿಗೆ ಈಡುಮಾಡುತ್ತದೆಯಷ್ಟೆ. ಭಗವಂತನಿಂದ ಸೃಷ್ಠಿಸಲ್ಪಟ್ಟ ಎಂಭತ್ತನಾಲ್ಕು ಲಕ್ಷ ಜೀವರಾಶಿಗಳಲ್ಲಿ ಮಾನವ ಜನ್ಮವೇ ಅತ್ಯಂತ ಶ್ರೇಷ್ಠವಾದದ್ದು ಎಂದು ಶ್ರುತಿ ಪುರಾಣಂಗಳು ಸಾರುತ್ತವೆ. ಬಹು ಬುದ್ಧಿವಂತ ಈ ಮಾನವ. ಆದರೂ ಈ ಪರಿಯೇಕೆ ? ಇನ್ನಾದರೂ ಚಿಂತಿಸಬೇಕಲ್ಲವೇ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)