ಬರಿ ಜಾಣತನವೆ ಬಾಳ್

ಎದೆಗೆ ಬೀಳದ ಬಿಜ್ಜೆ
ತಲೆಗೆ ಬಿದ್ದೇನು ಫಲ ?
ಹೃದಯಕಿಲ್ಲದ ಮೇಲೆ
ನೀರಸಮದಲ್ತೆ !?
ಭಾವಶೂನ್ಯತೆ ಬೆಳೆದು
ವಿತ್ತವೆತ್ತಿದರಾಯ್ತೆ ?
ಬರಿ ಜಾಣತನವೆ ಬಾಳ್
ಜಾಣಮೂರ್ಖ

ಇದು ಎಲ್ಲರ ಅನುಭವವಿರಬಹುದು! ಇಂದು ಬಹಳ ಮಂದಿ ಬಹು ಜಾಣತನದಿಂದ ಬದುಕುತ್ತಿದ್ದಾರೆ. ಮಾತಿನಲ್ಲಿ ! ಕೃತಿಯಲ್ಲಿ ! ಅಬ್ಬಾ ಅದೆಂತಹಾ ನಾಜೂಕು !? ಅದೆಂತಹಾ ಬುದ್ಧಿವಂತಿಕೆ !? ಹೃದಯ ಶೂನ್ಯತೆ ತಾಂಡವವಾಡುತ್ತಿರುತ್ತದೆ ! ವಿದ್ಯಾಭ್ಯಾಸವೂ ಅಷ್ಟೆ. ತಲೆಯನ್ನು ತಲುಪುತ್ತಿದೆ ಅಷ್ಟೆ. ಹೃದಯವನ್ನು ತಲುಪುತ್ತಿಲ್ಲ. ಎದೆ ತುಂಬಿದ ಭಾವದಲ್ಲಿ ಬದುಕಬೇಕಲ್ಲವೇ ಗೆಳೆಯರೇ ? ಇಲ್ಲದಿದ್ದರೆ ವರ್ಷಗಟ್ಟಲೆ ಓದಿ , ಪದವಿಗಳನ್ನು ಪಡೆದರೇನು ? ಕಚ್ಚಾವಸ್ತು ಸಿದ್ಧವಸ್ತುವಾಯ್ತಷ್ಟೆ! ಆತ್ಮಸಾಕ್ಷಾತ್ಕಾರದ ಗುರಿಯೇನಾಯಿತು ?! ಅದು ಬರೀ ಯಾಂತ್ರಿಕವಾಗಿ ಶಬ್ದಾಡಂಬರವೇ ? ಸಿದ್ಧಾಂತವಷ್ಟೆಯೇ ? ಇಂದಿನ ಪೀಳಿಗೆಯನ್ನು ಒಮ್ಮೆ ಸ್ವಲ್ಪ ಹಾಗೇ ಗಮನಿಸಿ. ಹಣಗಳಿಸಿದರೆ ಸಾಕು. ಮಾರ್ಗ ಯಾವುದಾದರೂ ಇರಲಿ. ಅವನು ಜಾಣನೆಂತಲೂ , ಹೃದಯವಂತನಾದವನು ದಡ್ಡನೆಂತಲೂ ಪರಿಗಣಿಸಲ್ಪಡುತ್ತಿರುವುದು ಮನುಕುಲದ ದೊಡ್ಡ ದೌರ್ಭಾಗ್ಯವೇ ಸರಿ. ಬದುಕು ಬರೀ ಜಾಣತನವಷ್ಟೇ ಅಲ್ಲ . ಇಲ್ಲಿ ಹೃತ್ಪೂರ್ವಕವಾಗಿ ಬದುಕಲು ಬೇರೇನನ್ನೋ ಕಲಿಸಬೇಕಿದೆ ನಮ್ಮ ಮಕ್ಕಳಿಗೆ. ಆದರೆ ಆ ಕಾರ್ಯವಾಗದೆ ಬೇರೆಲ್ಲವೂ ಆಗುತ್ತಿದೆ. ಹೀಗಾದಾಗ ಹೃದಯವಂತರಾಗಿ ಬದುಕೋದು ಯಾವಾಗ ? ಬುದ್ಧಿಕ್ರಾಂತಿಯೇ ಏರ್ಪಟ್ಟರೆ ಭಾವಕ್ರಾಂತಿ ನಡೆಯೋದು ಯಾವಾಗ ? ಹೇಗೆ ? ಬನ್ನಿ ಗೆಳೆಯರೇ ಚಿಂತಿಸೋಣ. ತಲೆಯಿಂದಲ್ಲ , ಹೃದಯದಿಂದ !

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)