ಕೊಡುಗೆ

ದೋಷಮೆಂತದು ಮೂಗ
ನುಡಿಯೊಳಗೆ ಬೇಡದಿರೆ!?
ಕುರುಡನೆರಗದೆ ಇರಲು
ದೋಷಮೆಲ್ಲಿಯದು ?
ಬಡವ ತಾ ಕೊಡದಿರಲು
ದೋಷಮೆಂತಾಗುವುದು
ಇದ್ದು ಕೊಡದಿರೆ ದೋಷ
ಜಾಣಮೂರ್ಖ //

ಭಗವಂತನಿಗೋ , ಸಮಾಜಕ್ಕೋ ಅಥವಾ ನಮ್ಮವರಿಗೋ ಒಟ್ಟಿನಲ್ಲಿ ಸೇವಾ ಮನೋಭಾವದಿಂದ ಕೊಡುವ ಸಾಮರ್ಥ್ಯವಿರುವಷ್ಟನ್ನು ನಾವು ಕೊಡಬಹುದು. ಶಕ್ತಿ ಮೀರಿ ಕೊಡಲೆಂತು ಸಾಧ್ಯ !? ಇದ್ದವರು ಕೊಡುತ್ತಾರೆ. ಇಲ್ಲದವರಿಂದ ಇದು ಹೇಗೆ ಸಾಧ್ಯವಾದೀತು ? ಇಲ್ಲದವರೂ ಕೊಡುತ್ತಾರೆ ನಿರಪೇಕ್ಷಿತ ಭಾವದಲ್ಲಿ. ಅದು ಶ್ರೇಷ್ಠವಾದ ದಾನ. ಆದರೆ ಮೂಗನಾದವನಿಂದ ಮಾತಿನಿಂದ ಸ್ತುತಿಸಿ ಪಾಡಲು ಸಾಧ್ಯವೇ ? ಅದನ್ನು ನಿರೀಕ್ಷಿಸಲಾದೀತೆ? ಮನಸ್ಸಿನಿಂದ ಪ್ರಾರ್ಥಿಸಿದರಷ್ಟೇ ಸಾಕು. ಗುರುವೋ, ದೈವವೋ ಎದುರಿಗೆ ಬಂದು ನಿಂತರೂ ಕುರುಡನಾದವನು ಕಾಣಲು ಸಾಧ್ಯವೇ ? ಕಂಡು ನಮಸ್ಕರಿಸಲು ಸಾಧ್ಯವೇ? ಅದರಲ್ಲಿ ದೋಷವೆಣಿಸಲಾದೀತೆ ? ನಿರ್ಗತಿಕನು ದೊಡ್ಡ ಮಟ್ಟದ ದಾನ ನೀಡದಿರಲು ದೋಷವೆಂತಾಗುತ್ತದೆ ? ಬೇಡರ ಕಣ್ಣಪ್ಪ ನೀಡಿದ ಮೊಲದ ಮಾಂಸದಿಂದ ಶಿವ ತೃಪ್ತನಾದಂತೆ, ಬಡವಳೊಬ್ಬಳು ನೀಡಿದ ನೆಲ್ಲೀಕಾಯಿಯಿಂದ ಶಂಕರಾಚಾರ್ಯರು ತೃಪ್ತರಾಗಿ ಅನುಗ್ರಹಿಸಿದಂತೆ ಇರುವುದರಲ್ಲಿ ಕೊಡುವ ಮನಸ್ಸಿನಿಂದ ಕೊಟ್ಟಾಗ ಅದು ಭಗವಂತನ ಮೆಚ್ಚುಗೆಗೆ,ಪ್ರೀತಿಗೆ ಪಾತ್ರವಾಗುತ್ತದೆ. ಇದರಲ್ಲಿ ಸಂದೇಹವಿಲ್ಲ. ಆದರೆ ಇದ್ದೂ ಕೊಡದಿದ್ದರೆ ಅದು ದೋಷವಲ್ಲದೇ ಮತ್ತೇನು ? ಅಲ್ಲವೇ ?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)