ನಿನ್ನ ನೀ ಬದುಕ ಬಿಡು

ಅಂತಿಹರು ಇಂತಿಹರು
ಲೋಗರೆನ್ನುತ ಮನದಿ
ಎಂತಿರುವೆ ನೀನೆನುವು
ದನು ಮರೆತೆಯೇಕೆ ?
ಅವರಂತೆ ಅವರಿರಲಿ
ನಿನ್ನ ನೀ ಬದುಕ ಬಿಡು
ಬದುಕಿ ತೋರಿಂತು ನೀ
ಜಾಣಮೂರ್ಖ//

ಇದೆಷ್ಟು ಸೂಕ್ಷ್ಮ ಮತ್ತು ಸಹಜ ಎಂದರೆ ನಾವೆಲ್ಲರೂ ಈ ತಪ್ಪನ್ನು ಮಾಡಿದ್ದೇವೆ. ಈಗಲೂ ಮಾಡುತ್ತಲೂ ಇದ್ದೇವೆ. ಅದೇನೆಂದರೆ ಬೇರೆಯವರ ಬಗ್ಗೆ ಅವರು ಹಾಗೆ ಇವರು ಹೀಗೆ ಎಂದು ಯೋಚಿಸಿ , ಹೋಲಿಸಿಕೊಂಡೇ ನಡೆಯುವ ನಾವು ನಾನು ಏನೆಂಬುದನ್ನೇ ಮರೆತುಬಿಟ್ಟಿರುತ್ತೇವೆ. ಜಗತ್ತು ಹೇಗಿದೆಯೋ ಹಾಗಿರಲಿ ಬಿಡು ಗೆಳೆಯ ! ಒಂದಿಷ್ಟು ನಿನ್ನನ್ನು ನೀನು ನೀನಾಗಿ ಬದುಕ ಬಿಡು ! ಇಂತಿಷ್ಟು ಬದುಕಿಬಿಡಯ್ಯ ಸಾಕು. ಎಷ್ಟೋ ನೆಮ್ಮದಿಯ ಬದುಕು ನಿನ್ನದಾಗುತ್ತದೆ. ನೀನೂ ಬದುಕಿ ಇತರರನ್ನು ಬದುಕಬಿಡು ಎಂಬ ಮಾತನ್ನು ಕೇಳಿದ್ದೆವು. ಸ್ವಲ್ಪ ಚಿಂತಿಸಿ ನಾನು ನನ್ನನ್ನೇ ಸರಿಯಾಗಿ ಬದುಕಬಿಡುತ್ತಿಲ್ಲ ! ಎಂಬ ಸತ್ಯ ಕಾಣುತ್ತದೆ. ಈ ಮುಕ್ತಕ ಓದಿದ ಮೇಲೆ ಕಣ್ಮುಚ್ಚಿ ನಮ್ಮ ಬಗ್ಗೆ, ನಾವು ನಡೆದು ಬಂದ ದಾರಿಯ ಬಗ್ಗೆ ಸ್ವಲ್ಪ ಚಿಂತಿಸಿ ನೋಡಿ ! ಕೆಲ ಕಾಲವಾದರೂ ನಮ್ಮಂತೆ ನಾವಿದ್ದರೆ ಬದುಕೆಷ್ಟು ಸುಂದರವಾಗಿರುತ್ತದೆ ಎಂದು!!!

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)