ತನುಮನವ ಸಂತೈಸ
ಲೇನೇನ ಗೈದಪೆವೊ!
ತನುಮನವನಿತ್ತವರಿ
ಗೇನನಿತ್ತಿಹೆವೊ !?
ತನುವಿಗನ್ನವನಿಕ್ಕಿ
ಮನಕೆ ಸಂಸ್ಕಾರವನು
ನೀಡುವರ್ಗೆದ್ದು ಮಣಿ
ಜಾಣಮೂರ್ಖ//
ಈ ಶರೀರ ಮತ್ತು ಈ ಮನಸ್ಸುಗಳನ್ನು ಸಂತೈಸಲು ನಾವು ಏನೇನೆಲ್ಲಾ ಮಾಡುತ್ತೇವೆ ! ಆದರೆ ಈ ಶರೀರವನ್ನಿತ್ತವರಿಗೆ ಏನು ಕೊಟ್ಟಿದ್ದೇವೆ ? ಮನಸ್ಸಿನಲ್ಲಿ ಸಂಸ್ಕಾರವೆಂಬ ಬೀಜವನ್ನು ಬಿತ್ತಿ ,ಬೆಳೆಸಿ ಹೆಮ್ಮರವಾಗಿಸಿ ನಮಗೊಂದು ಸುಂದರ ವ್ಯಕ್ತಿತ್ವವನ್ನು ನೀಡಿದ ತಂದೆ ತಾಯ್ಗಳಿಗೆ, ಗುರುಗಳಿಗೆ ಏನು ಕೊಟ್ಟಿದ್ದೇವೆ ? ಸ್ವಲ್ಪ ನಾವೆಲ್ಲಾ ಯೋಚಿಸಬೇಕಲ್ಲವೇ ? ಅವರಿಗೆ ನಾವು ಏನೂ ಕೊಡುವುದು ಬೇಡ. ಸಂತೋಷವನ್ನು ಕೊಟ್ಟರಷ್ಟೇ ಸಾಕು. ಅವರು ಬಯಸುವುದಷ್ಟೇ. ಅವರಿಗೆ ಎದ್ದು ನಿಂತು ಗೌರವಿಸೋಣ. ಅವರಿಗೆ ಮಣಿದೇ ನಡೆಯೋಣ. ಅವರು ಮುದುಕರೆಂದು ಕಡೆಗಣಿಸದೆ ಮನ್ನಣೆ ನೀಡಬೇಕು. ಎಲ್ಲವನ್ನೂ ಬಲ್ಲವರು ಅವರು. ಬಲ್ಲವರೊಡನೆ ಬಿಲ್ಲಾಗಿರಬೇಕಲ್ಲವೇ ? ಆಗಲೇ ಬದುಕು ಸಾರ್ಥಕ. ಏನಂತೀರಿ ?
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
