ಜನನದಾಚೆಗೆ ಅರಿಯೆ
ಮರಣದಾಚೆಗೆ ಅರಿಯೆ
ಜನನ ಮರಣದ ನಡುವೆ
ಅರಿತರೂ ಅರಿಯೆ !
ಅರಿವಿನಾ ಮರೆವೇಕೆ ?
ಸರಿದುದೇತಕೆ ದೂರ ?
ಏನಿದರ ಗೌಪ್ಯ ಕಾಣ್
ಜಾಣಮೂರ್ಖ//
ಇದೆಂತಹಾ ವಿಚಿತ್ರವಾದ ಬದುಕೆಂದರೆ ಜನನಕ್ಕೆ ಮುನ್ನ ನಾವೇನಾಗಿದ್ದೆವು ಎಂದು ಯಾರಿಗೂ ತಿಳಿಯದು. ಮರಣದ ನಂತರ ಏನಾಗುತ್ತೇವೆ ಎಂದು ಅದೂ ಸಹ ಯಾರಿಗೂ ತಿಳಿಯದು. ಈ ಜನನ ಮರಣದ ನಡುವಿನ ಈ ನಾಟಕವಿದೆಯಲ್ಲಾ ! ಇದು ಬಹಳ ವಿಚಿತ್ರ ಘಟ್ಟ ! ಇಲ್ಲಿ ತಿಳಿದಿದ್ದರೂ ತಿಳಿಯದವರಂತೆ ವರ್ತಿಸುತ್ತೇವೆ. ಏಕಿಂತಹಾ ಅರಿವಿನ ಮರೆವು ? ಅರಿವು ಸರಿಯಿತೇತಕೆ ದೂರ ? ತಾನು ಮಾಡುತ್ತಿರುವುದು ತಪ್ಪೆಂದು ತಿಳಿದಿದ್ದರೂ ಅದೇ ತಪ್ಪನ್ನು ಮಾಡುವ ಅಜ್ಞಾನವಾದರೂ ಏಕೆ ? ಏಕಿಂತಹಾ ಅಜ್ಞಾನ ? ಇದು ಬಹಳ ಗೌಪ್ಯ. ಕಾರಣವೇನೆಂದು ಎಷ್ಟು ಯೋಚಿಸಿದರೂ ಯಾರಿಗೂ ತಿಳಿಯದಿದು. ಇದರ ಗೌಪ್ಯತೆಯನ್ನರಿತವನು ಜೀವನ್ಮುಕ್ತನೇ ಸರಿ. ಸಾಧಕರಿಂದ ಮಾತ್ರ ಈ ಕಾರ್ಯಸಾಧನೆ ಸಾಧ್ಯ. ಏನಂತೀರಿ !?
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
