ಸತ್ಯ ಕಹಿ !

ಹಿತವಾದೊಡೇಂ ಬೇವು
ಕಹಿಯು ತಾನೆಲ್ಲರಿಗೆ
ಚಾಗಿಯಾದರು ಒಡೆಯ
ಖಳನವೊಲು ತಾನೆ!
ಒಳಿತಗೈದರು ತಪ್ಪ
ನರಸುವೀ ಜಗದೊಳಗೆ
ಒಪ್ಪದಿಂದಲೆ ಬಾಳೊ
ಜಾಣಮೂರ್ಖ//

ಬೇವು ಅದೆಷ್ಟೋ ರೋಗಗಳಿಗೆ ಸಿದ್ಧೌಷಧವಾದರೂ ಅದನ್ನು ಯಾರೂ ತಿನ್ನರು, ಇಷ್ಟಪಡರು. ಹಾಗೆಯೇ ಮನೆಯ ಅಥವಾ ಒಂದು ಸಂಸ್ಥೆಯ ಒಡೆಯನ ಸ್ಥಿತಿ. ತಾನೆಷ್ಟೇ ತ್ಯಾಗಿಯಾದರೂ ನೋಡುಗರ ದೃಷ್ಟಿಯಲ್ಲಿ ಅವನೋರ್ವ ಖಳನಾಯಕನಂತೆಯೇ ಬಿಂಬಿತನಾಗುತ್ತಾನೆ. ಅವನು ಒಳಿತನ್ನೇ ಗೈದರೂ ಜನರು ತಪ್ಪನ್ನೇ ಹುಡುಕುತ್ತಾರೆ. ಗೈದ ಒಳಿತು ಗೌಣವಾಗಿಬಿಡುತ್ತದೆ. ಏಕೆಂದರೆ ಒಬ್ಬನ ತಪ್ಪು ಹುಡುಕುವುದೇ ಉದ್ದೇಶವಾದಾಗ ಶ್ರೀರಾಮನಲ್ಲೂ ತಪ್ಪು ಹುಡುಕಬಹುದಲ್ಲವೇ ? ಒಳ್ಳೆಯದನ್ನು ಹುಡುಕುತ್ತಾ ಹೋದಂತೆ ಮನಸ್ಸು ಪ್ರಸನ್ನವಾಗುತ್ತದೆ. ತಾನೂ ಸಂತಸದಿಂದಿದ್ದು ಜಗತ್ತನ್ನೂ ಸಂತಸದಿಂದಿಡುತ್ತದೆ. ಆದರೆ ತಪ್ಪನ್ನೇ ಹುಡುಕುವ ಜಾಯಮಾನವು ತಾನೂ ತಪ್ಪನ್ನು ಮಾಡಿ ಅದನ್ನು ಮುಚ್ಚಿಹಾಕಲು ಇತರರ ತಪ್ಪುಗಳನ್ನು ಎತ್ತೆಣಿಸಲು ಹಾತೊರೆಯುತ್ತದೆ. ತಸ್ಕರಸ್ಯಾನೃತಂ ಬಲಂ ಎಂಬ ಮಾತು ಅದೆಷ್ಟು ಸತ್ಯ ಅಲ್ಲವೇ ? ಜಗತ್ತು ಹೇಗೇ ಇರಲಿ. ಓ, ಗೆಳೆಯಾ ನಿನ್ನ ಹಾದಿ ಸರಿಯಿರಲಿ. ದೇವರು ಒಳಿತಿನ ಹಾದಿಯಲ್ಲಿರುವವರನ್ನು ಎಂದಿಗೂ ಕೈಬಿಡನು. ಇದೇ ಸತ್ಯವು. ಇದು ಯಾರನ್ನೋ ಉದ್ದೇಶಿಸಿ ಹೇಳುತ್ತಿರುವುದಲ್ಲ ಸ್ನೇಹಿತರೇ ! ತಪ್ಪಾಗಿ ಭಾವಿಸಬೇಡಿ. ಸತ್ಯವು ಎಂದಿದ್ದರೂ ಕಹಿಯೇ !!! ಏನಂತೀರಿ ?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)