ಬಂಧನದ ಬದುಕು

ಹುಟ್ಟಿದಾ ಚಣದಿಂದ
ಚಟ್ಟವೇರುವ ತನಕ
ಮುಗಿಯವಯ್ಯೋ ಕೊರತೆ
ಬಂಧನದ ಬದುಕು !
ಬರಿಸ ಬರಿಸಂಗಳೆ
ದ್ದೋಡಿ ಮುಪ್ಪಡರಲೇಂ ?
ಅನುಭವವದೇನಾಯ್ತೊ
ಜಾಣಮೂರ್ಖ//

ಮೊನ್ನೆ ಊರಿಗೆ ಹೋಗುವಾಗ ಒಂದು ದೃಶ್ಯ ಕಣ್ಣಿಗೆ ಬಿತ್ತು. ಶತವೃದ್ಧನಿರಬಹುದು. ಆದರೂ ಗಟ್ಟಿ ಮಟ್ಟಾಗಿದ್ದ ಅಜ್ಜನನ್ನು ಮನೆಯ ಮುಂದೆ ಕೂರಿಸಿದ್ದಾರೆ. ಕೈಲೊಂದು ಕೋಲಿದೆ. ಸ್ವಲ್ಪ ಧಾನ್ಯವನ್ನು ಒಣಗಲು ಹರಡಿದ್ದಾರೆ. ಅಜ್ಜ ಬಿಸಿಲಲ್ಲೇ ಕುಳಿತಿದ್ದಾರೆ. ನಾನು ತಡೆಯದೆ ಅಜ್ಜಾ ! ನೆರಳಿಗಾದರೂ ನಡೆಯಿರಿ. ಏಕಿಷ್ಟು ಬಿಸಿಲಿನಲ್ಲಿ ಕೂತಿದ್ದೀರಿ ಎಂದೆ.ಅದಕ್ಕೆ ಅವರು – ಹಕ್ಕಿಗಳು ಮುತ್ತಿಕೊಳ್ತಾವೆ. ಮತ್ತೆ ಯಾರಾದರೂ ತಗೊಂಡು ಹೋದರೆ ಏನ್ಮಾಡೋದು ಹೇಳ್ರಿ ? ಎಂದರು. ಅಯ್ಯೋ ಎಂತಹುದಿದು ಮಾಯೆ ಎನಿಸಿತು. ಆಗಲೇ ಮೂಡಿದ್ದು ಈ ಮುಕ್ತಕ. ಹುಟ್ಟಿನಿಂದ ಚಟ್ಟವೇರುವ ತನಕವೂ ಈ ಕೊರತೆಯೆಂಬುದು ಮುಗಿಯುವುದೇ ಇಲ್ಲ. ಬಂಧನದ ಬದುಕು ! ವರ್ಷ ವರ್ಷಂಗಳೇ ಕಳೆದರೂ, ಹಣ್ಣು ಹಣ್ಣು ಮುದುಕರಾದರೂ ವ್ಯಾಮೋಹವು ಮಾತ್ರ ದೂರಾಗುವುದಿಲ್ಲ. ಅಯ್ಯೋ ಭಗವಂತನು ಈ ಸುಂದರವಾದ ಪ್ರಪಂಚಕ್ಕೆ ಸುಂದರವಾದ ಅನುಭವಗಳನ್ನು ಪಡೆದು ಬಾ ಎಂದು ಕಳಿಸಿದ್ದಾನೆ. ಪ್ರಕೃತಿ ಮಾತೆ ಯಾವ ಕೊರತೆಯನ್ನೂ ಮಾಡಿಲ್ಲ ನಮಗೆ. ಸವಿಯುತ್ತಾ ಬದುಕುವವನಿಗೆ ಇಲ್ಲಿನ ಸಾರ ಮುಗಿವುದೇ ಇಲ್ಲ. ಆದರೆ ನಾವು ಮಾತ್ರ ತಾಪತ್ರಯಗಳಲ್ಲೇ ಬದುಕನ್ನು ಕಳೆಯುತ್ತೇವೆ. ನಾವೇ ಕೊರತೆಗಳ ಸೃಷ್ಟಿಕರ್ತರು. ಏನಂತೀರಿ ?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)