*ಬಿಡುಗಡೆ *

ಸುಖವನರಸುವ ಸಖನೆ
ಸಾಗದಿರು ಬೆಂಬಿಡಿದು
ದುಃಖವದರಂತ್ಯ ಕಾಣ್
ದಾಂಗುಡಿಯದೇಕೆ ?
ಎಡವದಿರು ಅಡಿಗಡಿಗೆ
ಬಿಡು ಓಟವೆಂತ ಬಗೆ
ಅದೆ ಅಂತರಂಗ ಸುಖ
ಜಾಣಮೂರ್ಖ //

ನಮ್ಮದು ಬಹಳ ವಿಚಿತ್ರವೂ, ಕುತೂಹಲಕಾರಿಯೂ ಆದ ಪ್ರವೃತ್ತಿ. ವ್ಯಕ್ತಿಯೋರ್ವನ ಬೋಧನೆಗಳನ್ನು ಗೌರವಿಸುವ ನಾವು ಅದನ್ನು ಅಳವಡಿಸಿಕೊಳ್ಳುವಲ್ಲಿ ಹಿಂದೆಬಿದ್ದುಬಿಡುತ್ತೇವೆ. ಆಸೆಯೇ ದುಃಖದ ಮೂಲ ಎಂಬ ಬುದ್ಧನ ತತ್ತ್ವವನ್ನು ಗೌರವಿಸುವ ನಾವು ಆಸೆಯನ್ನು ಬಿಟ್ಟಿದ್ದೇವೆಯೇ? ಎಂದು ನಮ್ಮನ್ನು ನಾವು ಪ್ರಶ್ನಿಸಿಕೊಳ್ಳೋಣ ! ಸುಖವನ್ನರಸುತ್ತ ಮತ್ತದೇ ಓಟ ! ಮತ್ತೆ ದುಃಖ ! ಮತ್ತೆ ಓಟ ! ಸುಖದ ಹುಡುಕಾಟದ ಅಂತ್ಯ ದುಃಖವೇ ಆಗಿರುತ್ತದೆ. ಇದರಲ್ಲಿ ಸಂದೇಹವೇ ಇಲ್ಲ. ಆದರೂ ಅತ್ತ ದಾಂಗುಡಿಯಿಡುತ್ತೇವೆ. ಇದೆಂತಹಾ ಬಗೆ !? ಅಚ್ಚರಿಯೆನಿಸುವುದಿಲ್ಲವೇ ? ಸಿಗದ ಸುಖಕ್ಕಾಗಿ ಅಡಿಗಡಿಗೆ ಎಡವುತ್ತಲೇ ಇದ್ದೇವೆ. ಒಂದುಕ್ಷಣ ಈ ಓಟವನ್ನು ನಿಲ್ಲಿಸು. ಶಾಂತನಾಗು. ಮನದ ಹೊಯ್ದಾಟಕ್ಕೆ ಒಂದು ಪೂರ್ಣವಿರಾಮವಿಟ್ಟು ನೋಡು. ಅದೇ ಅಂತರಂಗ ಸುಖ. ಬೇಕು ಬೇಕೆಂಬ ಬಗೆಯಿಂದ ಇದು ಸಿಗದು. ಸಾಕೆಂಬ ನಿರ್ಲಿಪ್ತ ಭಾವದಲ್ಲಿ ಇದರ ಜಾಡು ಸಿಗುತ್ತದೆ. ಇಂತಹಾ ಭಾವದಿಂದ ಈ ಸತ್ಯ ಕಂಡ ಸಾದು ಸಂತರುಗಳ ಸಮಾಧಾನಕ್ಕೆ ಕಾರಣವೂ ಇದೇ ಆಗಿದೆ. ಒಂದೇ ಬಾರಿ ನಾವು ಈ ಹಂತ ತಲುಪುವುದು ಈ ಲೌಕಿಕ ಜೀವನದಲ್ಲಿ ಕಷ್ಟ. ಅದಕ್ಕೇ ಬೇರೆ ಬೇರೆ ಮಜಲುಗಳಲ್ಲಿ ಸ್ತರಗಳಲ್ಲಿ ಬಿಡುಗಡೆ ಪಡೆದುಕೊಳ್ಳಬೇಕಾದುದು ಅವಶ್ಯಕ , ಅನಿವಾರ್ಯ ಕೂಡ. ಏನಂತೀರಿ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)