ಬಾಳಿನಾಹವ
ಪಿಡಿದು ಶಸ್ತ್ರಾಸ್ತ್ರಗಳ ಅಂಜುವುದೆ ರಣದಲ್ಲಿ
ಒಡನೆ ಎದುರಾಳಿ ಕಂಡೋಡುವುದು ತರವೆ !
ಅಡಿಗಡಿಗೆ ಗುರುವಿತ್ತ ಅರಿವಿನಸ್ತ್ರವ ಬಳಸು
ನಡೆ ಬಾಳಿನಾಹವದಿ ಜಾಣಮೂರ್ಖ//
ಒಬ್ಬ ಶಸ್ತ್ರಸಜ್ಜಿತನಾದ ಯೋಧನು ಎದುರಾಳಿಯನ್ನು ಕಂಡು ರಣರಂಗದಿಂದ ಓಡುವುದು ತರವೇನು !? ಮಹಾಭಾರತದ ಉತ್ತರಕುಮಾರನಂತೆ ! ಅವನನ್ನು ರಣಹೇಡಿ ಎನ್ನುತ್ತಾರೆ. ಹಾಗೇನೇ ಈ ಬದುಕೂ ಕೂಡ ಒಂದು ಯುದ್ಧರಂಗವೇ ಸರಿ. ಇಲ್ಲಿನ ಸವಾಲುಗಳನ್ನೆದುರಿಸಲು ಭೌತಿಕ ಶಸ್ತ್ರಸ್ತ್ರಗಳು ಬೇಕಿಲ್ಲ. ಇದನ್ನರಿತೇ ಗುರುವು ಅರಿವೆಂಬ ದಿವ್ಯಾಸ್ತ್ರಗಳನ್ನು ಕರುಣಿಸುವನು. ಆ ಅಸ್ತ್ರಗಳನ್ನು ಹಿಡಿದಿದ್ದರೂ ಸಹ ಅಡಿಗಡಿಗೆ ಲೌಕಿಕ ಮಾಯೆಯೆಂಬ ಶತ್ರುವಿನ ಉಪಟಳಕ್ಕೆ ಹೆದರಿ ಓಡುವುದು ಸರಿಯೆ ? ಗುರುವಿತ್ತ ಜ್ಞಾನಾಸ್ತ್ರ , ಧೈರ್ಯಾಸ್ತ್ರ , ಪ್ರಜ್ಞಾಸ್ತ್ರಗಳೇ ಮೊದಲಾದ ದಿವ್ಯಾಸ್ತ್ರಗಳನ್ನು ಸಮಯಕ್ಕೆ ಸರಿಯಾಗಿ ಬಳಸಿ ಗೆದ್ದು ಬದುಕಬೇಕು. ಅದುಬಿಟ್ಟು ಹೆದರಿ ಓಡಬಾರದು. ಅದು ಹೇಡಿಗಳ ಲಕ್ಷಣ. ಈಸಬೇಕು ಇದ್ದು ಜಯಿಸಬೇಕು. ಅಲ್ಲವೇ ಗೆಳೆಯರೇ !?
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
