ಹಾಸಿ ಹೊದಿವಷ್ಟಿಹುದೊ
ಮೋಸಗೈವನುಮಿಲ್ಲಿ ರಾಜರೋಷದಿ ಬಾಳ್ವ
ಘಾಸಿಗೊಳಿಪಗೆ ಮರ್ತ್ಯ ಪರಮಪದವಯ್ಯ !
ಲೇಸಿನಿಂದೀಸುವಂಗೀಸೀಸೆ ಘಾಸಿಗಳು
ಹಾಸಿ ಹೊದಿವಷ್ಟಿಹುದೊ ಜಾಣಮೂರ್ಖ//
ಈ ಪ್ರಪಂಚದಲ್ಲಿ ಮೋಸ ಮಾಡುವವನು ತಾನೇನೂ ಮಾಡೇ ಇಲ್ಲವೆಂಬಂತೆ ರಾಜಾರೋಷದಿಂದ ಬದುಕುತ್ತಿದ್ದಾನೆ. ಇನ್ನೊಬ್ಬರನ್ನು ಘಾಸಿಗೊಳಿಸಿ ಬದುಕುವವನು ಸುಖವಾಗಿ ಜೀವಿಸುತ್ತಿದ್ದಾನೆ. ಅವನಿಗೆ ಈ ಮರ್ತ್ಯವು ಸ್ವರ್ಗಸದೃಶವಾಗಿದೆ. ಸರಳವಾಗಿ ಬದುಕುವವನಿಗೆ ಬಹುವಾದ ಕಷ್ಟಗಳು ಬಾಧಿಸುತ್ತಿವೆ. ಇದನ್ನು ಕಂಡೇ ಇರಬಹುದು ದಾಸರು “ಸತ್ಯವಂತರಿಗೇ ಇದು ಕಾಲವಲ್ಲ ದುಷ್ಟ ಜನರಿಗೇ ಸುಭಿಕ್ಷ ಕಾಲ” ಎಂದಿದ್ದಾರೆ. ಸತ್ಯವಂತರ ಕಷ್ಟಗಳು ಹಾಸಿ ಹೊದಿವಷ್ಟು ! ಹೆಜ್ಜೆ ಹೆಜ್ಜೆಗೂ ಇಲ್ಲಿ ಪರೀಕ್ಷೆಗಳೇ ! ಆದರೆ ಒಂದಂತೂ ಸತ್ಯ. ಮಿಥ್ಯದ ಉಪಟಳ ಬಹುಕಾಲ ನಡೆಯದು. ತೀರಾ ಉದ್ದವಾದದ್ದು ಒಂದು ದಿನ ಬಗ್ಗಲೇಬೇಕಲ್ಲವೆ ?
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
