ಬಾಳ್ಸಂತೆಯ ಬೊಂತೆ
ಸಂತೆಗೆನ್ನುತ ಬರಲು ಸುಂಕ ಕಟ್ಟಲೆ ಬೇಕು
ಚಿಂತೆಮಾಡಲು ಬೇಕು ಬೊಂತೆ ಹೊರಬೇಕು
ಸಂತೆಗೇ ಬಾರದಿರೆ ಚಿಂತೆಬೊಂತೆಗಳೆಲ್ಲಿ?
ಅಂತೆ ಬಾಳ್ಸಂತೆ ಕೇಳ್ ಜಾಣಮೂರ್ಖ//
ಸಂತೆಗೆ ಬಂದ ಮೇಲೆ ಸುಂಕ ಕಟ್ಟಲೇ ಬೇಕು. ಚಿಂತೆಯಂತೂ ಇದ್ದೇ ಇರುತ್ತದೆ. ಸಂತೆಯ ಬೊಂತೆ ಹೊರಲೇಬೇಕು. ಅದೆಷ್ಟು ಕಷ್ಟ !? ಸಂತೆಗೇ ಬರದಿದ್ದರೆ ಸುಂಕವೂ ಇಲ್ಲ , ಬೊಂತೆಯ ಭಾರವೂ ಇಲ್ಲ ಹಾಗೆಯೇ ಚಿಂತೆಯೂ ಇಲ್ಲ ! ಹಾಗೆಯೇ ಈ ಬಾಳ ಸಂತೆ. ಜನ್ಮವೆತ್ತಿದರೆ ತಾನೆ ಜಂಜಾಟ ! ಜನ್ಮಕ್ಕೆ ಬರದಂತೆ ಎಚ್ಚರ ವಹಿಸಬೇಕೆಂದು ಸಾಧಕರ ಸಂದೇಶ. ಅದಕ್ಕೆ ನಾವು ಸಾಧಕರಾಗಬೇಕು. ಜನನ ಮರಣದ ಗುಟ್ಟನ್ನು ಅರಿಯಬೇಕು . ತನ್ಮೂಲಕ ಮುಕ್ತಿ ಮಾರ್ಗದ ಮೆಟ್ಟಿಲನ್ನು ಏರಬೇಕು. ಈಗ ಬಂದಿದ್ದಾಗಿದೆ. ಮುಂದೆ ಎಚ್ಚರವಹಿಸಬೇಕಾಗಿದೆ. ಅಲ್ಲವೇ ಗೆಳೆಯರೇ ?!
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
