ಧ್ಯಾನವಾಗಿಸೊ ಬದುಕ

ಧ್ಯಾನಗೈಯ್ಯಲು ಮನವನಣಿಗೊಳಿಸಲೇಕೆ ನೀ ಧ್ಯಾನವಾಗಿಸೊ ಬದುಕ ಮೌನದೊಳಗಿದ್ದು!
ಮೌನದೊಳಗೀಕ್ಷಿಸುತ ಬಾಳಿನೀ ನಾಟಕವ
ಮೌನದಿಂ ತಾಳೇಳೊ ಜಾಣಮೂರ್ಖ//

‘ಧ್ಯಾನ’ ಎಂತಹಾ ಪರಿಕಲ್ಪನೆ ! ಎಂತಹಾ ಸ್ಥಿತಿ ! ಇದಕ್ಕೆ ಮನಸ್ಸನ್ನು ಅಣಿಗೊಳಿಸೋದು ಅವಶ್ಯವೇ ! . ಆದರೆ ಹೇಗೆ ? ಪೂರ್ವಾಭಿಮುಖವಾಗಿ , ಮಣೆಯನ್ನೋ ಚಾಪೆಯನ್ನೋ ಹಾಕಿಕೊಂಡು , ಇಷ್ಟದೈವವನ್ನು ಸ್ಮರಿಸಿಕೊಂಡು ,ನಿಶ್ಯಬ್ದವಾದ ನಿಗದಿತ ಸ್ಥಳದಲ್ಲಿ ಕುಳಿತು ಹೀಗೇ ಏನೇನೋ ವ್ಯವಸ್ಥೆಗಳೆಲ್ಲಾ ಆಗಬೇಕು. ಅದೆಲ್ಲಕ್ಕಿಂತ ಮುನ್ನ ಧ್ಯಾನದ ಅರ್ಥ ಮತ್ತೆ ಗುರಿಯನ್ನು ಅರಿಯಬೇಕಲ್ಲವೇ !? ಗುರಿಯನರಿಯದೆ ಇವೆಲ್ಲಾ ವ್ಯವಸ್ಥೆಗಳಿದ್ದರೂ ಪ್ರಯೋಜನವಾಗದು ! ಹಾಂ ಅಂದಹಾಗೆ ಬದುಕನ್ನೇ ಧ್ಯಾನವಾಗಿಸಿಬಿಟ್ಟರೆ ! ಮೌನವಾಗಿ ಕಾಯಕದಲ್ಲಿ ತನ್ಮಯನಾಗಿಬಿಟ್ಟರೆ ! ಸಂದೇಹವೇ ಬೇಡ. ಅದು ಉನ್ನತಮಟ್ಟದ ಧ್ಯಾನ. ಬದುಕಿನ ಈ ನಾಟಕವನ್ನು ಮೌನವಾಗಿ ಹಾಗೇ ಸುಮ್ಮನೆ ವೀಕ್ಷಿಸಿ. ಎಂತೆಂತಹಾ ಪಾತ್ರಗಳಿವೆ ಗೊತ್ತೆ ? ನೋಡಿ ಅನುಭವಿಸಿ. ಅಂಟಿಕೊಳ್ಳಬೇಡಿ ಅಷ್ಟೆ. ಬೇಡೆಂದರೂ ನಿಮಗೂ ನಿಮ್ಮದೇ ಆದ ಪಾತ್ರಗಳು ಬರುತ್ತವೆ. ನಿರ್ಲಿಪ್ತತೆಯಿಂದ , ಮರೆವಿಗೆ ಈಡಾಗದೆ ತಾಳ್ಮೆಯಿಂದ, ಎಚ್ಚರಿಕೆಯಿಂದ ನಿರ್ವಹಿಸಿ. ಪಥ ಬಿಡಬಾರದಷ್ಟೆ. ಇದೇ ಧ್ಯಾನ. ಇದರಿಂದ ಸಿಗುವ ಆನಂದವನ್ನು ಅನುಭವಿಸಿ. ನೋಡಿ ಧ್ಯಾನದ ಫಲಿತವೆಂತಿರುತ್ತದೆ ಎಂದು !!

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)