ಸಿದ್ಧ

ಸಿದ್ಧ

ಅಧ್ಯಾತ್ಮ ಪೇಳ್ದೊಡೇಂ! ಸಿದ್ಧನಂತಿರ್ದೊಡೇಂ!
ಅಧ್ಯಯನದಿಂ ದಿವ್ಯ ಸಿದ್ಧಿಗಳ ಪಡೆಯೆ!
ಅಧ್ಯಾತ್ಮ ಸಿದ್ಧಿಯಿಂ ಮೃತ್ಯುಭಯವಳಿಯದಿರೆ
ಸಿದ್ಧನೆಂತಾದಾನೊ ಜಾಣಮೂರ್ಖ//

ಇಂದು ಎಲ್ಲರೂ ಅಧ್ಯಾತ್ಮದ ಬಗ್ಗೆ ಮಾತನಾಡುತ್ತಾರೆ . ಇದು ತುಂಬಾ ಒಳ್ಳೆಯ ಬೆಳವಣಿಗೆ. ಮನಶ್ಶಾಂತಿಗೆ ಇದು ತುಂಬಾ ಅಗತ್ಯ. ಕೆಲವರು ಇನ್ನೂ ಒಂದು ಹೆಜ್ಜೆ ಮುಂದೆ ಹೋಗಿ ದಿವ್ಯ ಸಿದ್ಧಿಗಳನ್ನು ಪಡೆದು ಸಿದ್ಧರೇ ಆಗುತ್ತಾರೆ. ಅದು ಅವರ ಪೂರ್ವಜನ್ಮದ ಸಂಸ್ಕಾರ ಬಲ . ಕೆಲವರು ಹೆಚ್ಚಿನ ಅಧ್ಯಯನ ಮಾಡಿ ಸಿದ್ಧರು ಎನಿಸಿಕೊಳ್ಳುತ್ತಾರೆ ! ಕೆಲವರು ಸಿದ್ಧರಂತೆ ಸೋಗು ಹಾಕುತ್ತಾರೆ! ಮತ್ತೆ ಕೆಲವರು ಸ್ವಯಂ ಘೋಷಿತ ದೇವಮಾನವರೇ ಆಗಿಬಿಡುತ್ತಾರೆ. ಕೆಲವರು ತಾನು ದೈವಚಿತ್ತಕೆ ಪ್ರಿಯನು ಎಂದುಕೊಂಡರೆ ಮತ್ತೆ ಕೆಲವರಿಗೆ ಈ ಭಾವವೇ ಉದರ ಪೋಷಣೆಯ ಮಾರ್ಗವಾಗಿಬಿಡುತ್ತದೆ ! ಇವರನ್ನು ನಂಬಿ ನಡೆಯುವುದು ಕುರುಡನೊಬ್ಬನು ಮತ್ತೊಬ್ಬ ಕುರುಡನ ಕೈಹಿಡಿದು ನಡೆದಂತೆ!! ಅದರೆ ಯಾರಲ್ಲಿ ದೇಹಭಾವವು ಅಳಿದಿರುವುದೋ , ಮೃತ್ಯುಭಯವು ಇರುವುದಿಲ್ಲವೋ ಅವರೇ ನಿಜವಾದ ಸಿದ್ಧರು. ಇಂತಹಾ ಅಧ್ಯಾತ್ಮ ಗುರು ಸಿಗುವುದು ಬಹು ದುರ್ಲಭ. ಅಧ್ಯಯನವೋ , ಅನುಭವವೋ , ಸಿದ್ಧಿಯೋ ಆತ್ಮಜ್ಞಾನವಾಗಿ ಅಳವಟ್ಟಾಗ ಅದೇ ನಿಜವಾದ ಸಿದ್ಧಿ.ಅಂತಹಾ ಅರಿವು ಸಿದ್ಧಿಸಿದವರು ನಿರ್ಲಿಪ್ತರು ! ಸದಾ ಸುಖಿಗಳು ! ನಿಜವಾದ ಸಿದ್ಧರು ! ಅಲ್ಲವೇ ಗೆಳೆಯರೇ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)