ನಿರ್ಲಿಪ್ತ
ದೇಹಕಂಟಿದ ಕೇಶ ಉಗುರ ಕತ್ತರಿಸಿದೊಡೆ
ನೇಹವೋ ! ನೋವೀಯದೆಂತ ಬಾಂದವ್ಯ!
ದೇಹ ಮೋಹಂಗಳೆರಡಿಂತಿರಲು ನಿರ್ಲಿಪ್ತ
ದಾಹವಳಿವುದೊ ದಿಟದಿ ಜಾಣಮೂರ್ಖ//
ಸ್ನೇಹಿತರೇ, ಇದೆಂತಹಾ ವಿಚಿತ್ರ ನೋಡಿ ಈ ಶರೀರಕ್ಕಂಟಿದ ಉಗುರು , ಕೂದಲುಗಳನ್ನು ಕತ್ತರಿಸಿದರೂ ಸ್ವಲ್ಪವೂ ನೋವಾಗೋದಿಲ್ಲ. ಅದೆಂತಹಾ ಸ್ನೇಹ ಬಾಂಧವ್ಯ ಅವೆರಡರ ನಡುವೆ ! ಆದರೆ ಕತ್ತರಿಸೋ ಸಾಧನವು ಶರೀರಕ್ಕೆ ತಾಗಬಾರದು ಅಷ್ಟೆ . ಈ ಶರೀರ ಮತ್ತು ಮನಸ್ಸಿಗಂಟಿದ ಮೋಹ ಹೀಗೇ ಬೇರ್ಪಟ್ಟರೆಷ್ಟು ಚಂದ. ಅಲ್ಲವೇ !? ನಿರ್ಲಿಪ್ತರಾಗಿಬಿಡುತ್ತೇವೆ ! ಲೌಕಿಕ ವ್ಯಾಮೋಹವೇ ಇಲ್ಲದ ಮೇಲೆ ಎಷ್ಟು ನಿರಾತಂಕ ಬದುಕು! ಎಲ್ಲ ರೀತಿಯ ದಾಹಂಗಳಳಿದು , ಮೋಹಂಗಳಳಿದು ಲೌಕಿಕ ಬದುಕಿಗೆ ಅಂಟಿಯೂ ಅಂಟದಂತೆ ಬದುಕಿದರೆ ಎಷ್ಟು ಚಂದ ! ಆದರೇನು ಮಾಡುವುದು ಈ ದೇಹ ಮತ್ತು ಮನದ ವ್ಯಾಮೋಹಗಳು ಒಂದನ್ನೊಂದು ಬಿಡುವುದೇ ಇಲ್ಲ! ಎಂತಹಾ ಅಪೂರ್ವ ಸೃಷ್ಟಿ ಅಲ್ಲವೇ ಗೆಳೆಯರೇ !?
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
