ನಿನ್ನರಿವೆ ಗುರು ನಿನಗೆ
ನಿನ್ನ ಮರೆವೆಯೆ ನಿನಗೆ ದುಃಖದೊಳ್ದೂಡುತಿದೆ
ನಿನ್ನಿಂದಲೇ ನಿನಗೆ ಸಂಕಟವದರಿಯೊ
ನಿನ್ನ ಮರೆವೆಯ ತೆರೆಯ ನೀನೆ ಸರಿಸಲು ಬೇಕು
ನಿನ್ನರಿವೆ ಗುರು ನಿನಗೆ ಜಾಣಮೂರ್ಖ//
ಓ ಗೆಳೆಯಾ , ನಮ್ಮೆಲ್ಲಾ ಕಷ್ಟಪರಂಪರೆಗಳಿಗೆ ನಮ್ಮ ಅಜ್ಞಾನವೇ ಕಾರಣವಾಗಿದೆ. ಅದೇ ನಮ್ಮನ್ನು ದುಃಖದಲ್ಲಿ ದೂಡುತ್ತಿದೆ. ನಮ್ಮ ಸಂಕಟಕ್ಕೂ ನಾವೇ ಕಾರಣರು. ಮತ್ತೆ ಅದನ್ನು ನಾವೇ ಕಳೆದುಕೊಳ್ಳಬೇಕು. ಈ ನಿಟ್ಟಿನಲ್ಲಿ ನಮ್ಮ ಅರಿವೇ ನಮಗೆ ಗುರುವಿನೋಪಾದಿಯಲ್ಲಿ ನಿಂತು ಸಹಾಯ ಮಾಡುತ್ತದೆ. ಗುರುವಿನ ವ್ಯಾಪ್ತಿ ಅನಂತ. ಅದರ ಆಳ ಹರವುಗಳು ನಮ್ಮಳವನ್ನು ಮೀರಿದುದು. ಗುರುವಿಗೆ ಭಕ್ತಿಯಿಂದ ನಿಷ್ಠನಾಗಿದ್ದು ಕಠಿಣ ಪರಿಶ್ರಮದಿಂದ ಗಳಿಸಿದ ಅರಿವು ನಮ್ಮ ತಲೆಕಾಯುತ್ತದೆ. ಎದೆಗೆ ಬಿದ್ದ ಅಕ್ಷರ ಭೂಮಿಗೆ ಬಿದ್ದ ಬೀಜ ಫಲ ಕೊಡದೇ ಇರುವುದಿಲ್ಲ ! ನಿಷ್ಠೆ ಬೇಕಷ್ಟೆ.
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
