ವಿಸ್ಮಯ ಪ್ರಪಂಚ
ಮನೆಗು ಮುನ್ನವು ಬಯಲು ಮನೆಬೀಳೆ ಬಯಲಂತೆ
ತನುವೆಂಬ ಮನೆಹುಟ್ಟಿ ಬೀಳೆ ಬರಿ ಬಯಲು
ಘನಮನೆಯು ಬಯಲಪ್ಪುದಚ್ಚರಿಯ ಕಾಣೇಳು
ಕೊನೆಗೆಲ್ಲವೂ ಬಯಲೊ ಜಾಣಮೂರ್ಖ//
ನಾನು ಅರಮನೆಯ ಕಟ್ಟಿಸಿದೆ ಎಂದು ಬೀಗುತ್ತಾನೆ ಮನುಷ್ಯ. ಒಂದು ದಿನ ಆ ಮನೆ ಬೀಳಲೇ ಬೇಕು. ಮನೆ ಕಟ್ಟುವ ಮುನ್ನ ಅಲ್ಲಿ ಬಯಲಿತ್ತು , ಆ ಮನೆ ಬಿದ್ದಮೇಲೂ ಬಯಲಿದೆ ! ಅಂದರೆ ಬಯಲು ಚಿರವೆಂದಾಯ್ತು ಅಲ್ಲವೇ !? ತನುವಿನ ಮನೆಯೂ ಚಿರವಲ್ಲ ! ಅದೂ ಬಯಲಲ್ಲಿ ಬಯಲಾಗಿ ಹೋಗುತ್ತದೆ. ಚಿರವೆಂಬ ಭ್ರಮೆ ಮಾತ್ರ ನಮ್ಮದು ! ಎಂತಹಾ ಅಚ್ಚರಿಯಲ್ಲವೇ !? ಈ ಭ್ರಮೆಯಲ್ಲೇ ಬದುಕುತ್ತಿರುವುದೂ ಅಂತೆಯೇ ಭ್ರಮೆಯಲ್ಲೇ ಬಯಲಾಗೋದೂ ಸಹ ಸತ್ಯ! ಅಲ್ಲಿಯ ವರೆಗೂ ಅರಿವಾಗದಿರೋದೂ ಸಹ ಅಚ್ಚರಿಯೇ ! ಕೊನೆಗೆಲ್ಲವೂ ಬಯಲೋ ಬಯಲು ! ಅಷ್ಟೆ ! ಒಟ್ಟಿನಲ್ಲಿ ವಿಸ್ಮಯ ಪ್ರಪಂಚ ! ಅಲ್ಲವೇ ಗೆಳೆಯರೇ !?
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
