ಘನವಳಿದು ಘನನಾಗೊ
ತನು ಕರಗದಾ ಮೇಲೆ ಜಪತಪದಿ ಫಲವೇನು?
ಮನವು ಅರಳದೆ ಬರಿದೆ ಮಡಿ ಮಾಡಲೇನು?
ಧನಮಿರ್ದೊಡೇನು ಸತ್ಪಾತ್ರಕ್ಕೆ ಸಲ್ಲದಿರೆ
ಘನವಳಿದು ಘನನಾಗೊ ಜಾಣಮೂರ್ಖ//
ಜೀವಶಿವಸೇವೆಯಲ್ಲಿ , ದಯೆ ಕಾರುಣ್ಯಗಳಲ್ಲಿ ತನು ಕರಗದ ಮೇಲೆ ಬರೀ ಜಪ ತಪಗಳನ್ನಾಚರಿಸಿದ ಮಾತ್ರಕ್ಕೆ ಯಾವ ಪ್ರಯೋಜನವೂ ಇಲ್ಲ. ಮನಸ್ಸು ಪ್ರೀತಿಯಿಂದ ಮೃದುವಾಗಬೇಕು ! ಅರಳಬೇಕು , ಇಂದು ಕೆರಳುತ್ತಿದೆ! ಕೆರಳಿದ , ಮಲಿನಗೊಂಡ ಮನಸ್ಥಿತಿಯಲ್ಲಿ ಒದ್ದೆಯುಟ್ಟು ಮಡಿ ಆಚರಿಸಿದರೇನು ಬಂತು!? ನಮ್ಮ ಬಳಿ ಹೇರಳವಾಗಿ ಸಂಪತ್ತು ಇದ್ದರೇನು ಬಂತು ! ಅದು ಸತ್ಪಾತ್ರಕ್ಕೆ ಸಲ್ಲಬೇಕು. ಅಂದರೆ ಒಳ್ಳೆಯ ಕಾರ್ಯಕ್ಕೆ ವಿನಿಯೋಗವಾಗಬೇಕು. ಇಲ್ಲದಿದ್ದರೆ ವ್ಯರ್ಥ. ಘನವಳಿದು ನಾವು ಘನರಾಗಬೇಕು. ಅಂದರೆ ಮನದ ಕಾಠಿಣ್ಯವಳಿದು ಘನತೆ ಉಳ್ಳವರಾಗಬೇಕು. ಆಗ ಬದುಕು ತುಂಬಾ ಸುಂದರ ಮತ್ತು ಶಾಂತವಾಗಿರುತ್ತದೆ. ಅಲ್ಲವೇ ಗೆಳೆಯರೇ !?
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
