ಬಲ್ಲಿದನ ಬಿಡದಿರೆಲೊ
ಕಲ್ಲ ದೋಣಿಯನೇರಿ ಕಡಲ ದಾಟುವ ತೆರದಿ
ಮುಳ್ಳ ಬೇಲಿಯ ಹಾದು ದಡವ ಸೇರ್ವಂತೆ
ಸಲ್ಲದಾ ಮಾಯೆಯೊಡೆ ಬಾಳ ಸಾಗರವೀಸೆ
ಬಲ್ಲಿದನ ಬಿಡದಿರೆಲೊ ಜಾಣಮೂರ್ಖ//
ಕಡಲನ್ನು ದಾಡಬೇಕು. ಆದರೆ ಕಲ್ಲ ದೋಣಿಯೇರಿ ಮುಂದೆ ಸಾಗಿದಂತಾಗಿದೆ ಬದುಕು ! ದಡವನ್ನೇನೋ ಸೇರಬೇಕು , ಆದರೆ ಸುತ್ತಲೂ ಮುಳ್ಳಬೇಲಿ ! ತುಂಬಾ ಜಾಗ್ರತೆಯಿಂದ ಹೆಜ್ಜೆಯಿಡಬೇಕು. ಇಲ್ಲದಿದ್ದರೆ ಮುಳ್ಳು ಚುಚ್ಚುತ್ತದೆ. ಹಾಗೆಯೇ ಬಾಳ ಸಾಗರ ಸಹ ! ದಡ ಮುಟ್ಟುವುದು ಬಹು ಕಷ್ಟ. ಬಹು ಜಾಗರೂಕರಾಗಿ ಸಾಗಬೇಕು. ಜಾಗರೂಕರಾಗಿ ಅನ್ನೋ ಪದದ ವ್ಯಾಪ್ತಿ ಬಹಳಷ್ಟು ದೊಡ್ಡದು. ಅದನ್ನು ಜನರು ಅವರವರ ದೃಷ್ಟಿಕೋನಕ್ಕನುಗುಣವಾಗಿ , ಸಂಸ್ಕಾರಕ್ಕನುಗುಣವಾಗಿ ನಿರ್ಧರಿಸುತ್ತಾರೆ. ಏನೇ ಆದರೂ ಜಗತ್ತನ್ನೇ ನಡೆಸುತ್ತಿರುವ ದಿವ್ಯಶಕ್ತಿಯ ಕೈ ಬಿಡದೆ ನಂಬಿ ನಡೆಯಬೇಕಾದುದು ಅಗತ್ಯ. ಅಲ್ಲವೇ ಗೆಳೆಯರೇ !?
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
