ಶಿವಪಥ
ಜವನ ಕಾಣದೆ ಶಿವನ ಕಂಡನಾ ಮುನಿಬಾಲ
ಭವದ ಗುರಿಯಭವನಾ ಚರಣದೊಳು ನಿಲಿಸಿ
ಅವಲೀಲೆಯಿಂ ಭವವ ಗೆಲುವ ತತ್ತ್ವವನರುಹಿ
ಶಿವ ಮೆರೆದನಿದನರಿಯೊ ಜಾಣಮೂರ್ಖ//
ಏಳೆಂಟು ವರ್ಷದ ಮುನಿಬಾಲಕ ಮಾರ್ಕಂಡೇಯನಿಗೆ ಒಂದು ವಾರ ಮುನ್ನವೇ ಯಮರಾಯನು ಬಂದು ತನ್ನ ಪ್ರಾಣವನ್ನು ಕೊಂಡೊಯ್ಯುವ ಸುಳಿವು ಸಿಕ್ಕಿತು ! ಜಾಗೃತನಾದ ಮುನಿಬಾಲ ಅನನ್ಯ ಭಕ್ತಿಯಿಂದ ಭಜಿಸಿದ. ಶಿವಲಿಂಗವನ್ನು ಅಪ್ಪಿದ, ತನ್ನನ್ನು ಹುಟ್ಟು ಸಾವಿನ ಸುಳಿಯಿಂದ ಎತ್ತಿಕೊಂಡು ಕಾಪಾಡೆಂದು ಬೇಡಿದ. ಮನವನ್ನು ಶಿವನ ಪಾದಾರವಿಂದಗಳಲ್ಲಿ ನೆಲೆ ನಿಲ್ಲಿಸಿದ ! ಜವನನ್ನು ಕಾಣಬೇಕಿದ್ದವನು ಶಿವನನ್ನು ಕಂಡು ಧನ್ಯನಾದ. ಮರಣವನ್ನೇ ಗೆದ್ದ ! ಶಿವಸಾಯುಜ್ಯವನ್ನು ನೀಡಿದ ಶಿವನು ಜಗತ್ತಿಗೆ ಅವಲೀಲೆಯಿಂದ ಭವವ ಗೆಲ್ಲುವ ತತ್ತ್ವವನ್ನು ತಿಳಿಸಿ ದಾರಿ ತೋರಿದ್ದಾನೆ. ನಾವು ಕಥೆ ಕೇಳುತ್ತೇವೆ ! ಆತ್ಮಾನುಸಂಧಾನದ ಹಂತ ತಲುಪುವುದೇ ಇಲ್ಲ ! ಸಾಕ್ಷಾತ್ ಶಿವನೇ ದಾರಿ ತೋರಿದರೂ ಅಡ್ಡದಾರಿ ಹಿಡಿದು ದಾರಿ ತಪ್ಪುತ್ತೇವೆ. ಎಂತಹಾ ವಿಪರ್ಯಾಸವಲ್ಲವೆ !?
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
