ಪರೋಪಕಾರಾರ್ಥಮಿದಂ

ಮಣ್ಣಲ್ಲೆ ಮೊಳೆತು ತಾ ಗಿಡವಾಗಿ ಕಾಯಾಗಿ
ಹಣ್ಣಾಗುತಳ್ಳೆಯಾ ರೂಪಿಂದಲೊಪ್ಪಿ
ಚಿಣ್ಣರಿಂದೆಲ್ಲರ್ಗೆ ವಸ್ತ್ರವಾಗುತ ನಮೆದು
ಮಣ್ಣ ಸೇರ್ವುದೆ ಚೋದ್ಯ ಜಾಣಮೂರ್ಖ //

ಇದೊಂದು ದೃಷ್ಟಾಂತವಷ್ಟೆ . ಅದರೆ ಎಲ್ಲವೂ ಹೀಗೆಯೇ ! ಎಲ್ಲಿಂದ ಬಂದೆವೋ ಅಲ್ಲಿಗೇ ನಿರ್ಗಮನ ! ಮಣ್ಣಲ್ಲೇ ಮೊಳಕೆಯೊಡೆದು , ಗಿಡವಾಗಿ , ಕಾಯ್ಬಿಟ್ಟು , ಹಣ್ಣಾಗಿ ಅಳ್ಳೆಯ ಅಂದರೆ ಹತ್ತಿಯ ರೂಪಪಡೆದು ಚಿಕ್ಕವರಿಂದ ಹಣ್ಣು ಹಣ್ಣು ಮುದುಕರ ವರೆಗೆ ಎಲ್ಲರಿಗೂ ವಸ್ತ್ರವಾಗುತ್ತದೆ. ಆ ವಸ್ತ್ರ ಹಾಗೇನೇ ಇರೋದಿಲ್ಲ. ಕಾಲಕ್ರಮೇಣ ನವೆದು ಹೋಗುತ್ತದೆ. ಆಮೇಲೆ ನಾವದನ್ನು ಅಷ್ಟಕ್ಕೇ ಬಿಡದೆ ನೆಲ ಒರೆಸೋಕೂ ಬಳಸುತ್ತೇವೆ. ನಂತರ ತಿಪ್ಪೆಗೆ ಎಸೆದುಬಿಡುತ್ತೇವೆ ತಾನೆ !? ಅದು ಅಲ್ಲಿಯೇ ಮಣ್ಣು ಸೇರಿ ಮಣ್ಣಲ್ಲಿ ಮಣ್ಣಗಿಬಿಡುತ್ತೆ ! ಮಣ್ಣಲ್ಲಿಯೇ ಹುಟ್ಟಿ ಮಣ್ಣನ್ನೇ ಸೇರೋ ಹತ್ತಿಯ ಈ ಬದುಕಿನ ಚಕ್ರ ಜಗತ್ತಿನ ಎಲ್ಲ ಜೀವಿಗಳ ಬದುಕಿಗೂ ಎಷ್ಟು ಹತ್ತಿರ ! ಎಂತಹಾ ಅಚ್ಚರಿ ! ಆದರ್ಶ! ಅಲ್ಲವೇ ? ಪಂಚಭೂತಗಳಿಂದಾದ ಶರೀರ ಕೊನೆಗೆ ಪಂಚಭೂತಗಳಲ್ಲೇ ಲೀನವಾಗುತ್ತದೆ ! ಆದರೆ ಈ ನಡುವಿನ ಬದುಕು ಮಾತ್ರ ಹತ್ತಿಯ ಬದುಕಿನಂತೆಯೇ ಇದ್ದರೆ ಎಷ್ಟು ಚಂದ ! ಅಲ್ಲವೇ ಗೆಳೆಯರೇ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)