ಪದ್ಮಪತ್ರನಾಗುವ ಬಗೆ

ಪದ್ಮಪತ್ರರ ಸಂಗ ದೊರೆಕೊಂಡು ಗುರುಪಾದ
ಪದ್ಮದೊಳು ಸುಖಿಯಪ್ಪುದೈ ಆತ್ಮ ಕೆಳೆಯ
ಛದ್ಮವೇಷದ ಮರೆವ ಗುರು ಕರುಣೆಯಿಂ ಕಳೆದು
ಪದ್ಮಪತ್ರನೆ ಆಗೊ ಜಾಣಮೂರ್ಖ //

ಗುರುಪಥದಲ್ಲಿದ್ದರೆ ಸಾಕು ! ನಾವು ಪದ್ಮಪತ್ರರಾದೆವೆಂದೇ ಅರ್ಥ. ಬದುಕಿನಲ್ಲಿ ಹೀಗಿರಬೇಕು ಎನ್ನುವುದಕ್ಕೆ ಪದ್ಮಪತ್ರವು ಒಂದು ಉಪಮಾನವಾದರೂ ಆ ತತ್ತ್ವ ಮಾತ್ರ ಉನ್ನತವಾದದ್ದು. ಅರಿತೋ ಅರಿಯದೆಯೋ ಈ ಜನ್ಮದೊಳಂಟಿದ ಮರೆವನ್ನು ಗುರುಕರುಣಾಮೃತದಿಂದ ತೊಳೆದು ಮತ್ತೆ ಮತ್ತೆ ಅದಕ್ಕೆ ಅಂಟದೇ ಬದುಕೋದಿದೆಯಲ್ಲಾ ಅದೇ ಪದ್ಮಪತ್ರರಾಗುವ ಬಗೆ. ಆದರೆ ಇಂತಹಾ ಚಿಂತನೆಗಳೆಡೆಗೊಯ್ದ ಗುರು ಬಂಧುಗಳು ನಿಜಕ್ಕೂ ಪದ್ಮಪತ್ರರೇ ಸರಿ. ಅಂತಹವರ ಸತ್ಸಂಗದಿಂದ ಸದ್ಗುರುವಿನ ದಿವ್ಯ ಚರಣಾರವಿಂದ ಸಾನಿಧ್ಯದಲ್ಲಿ ಆತ್ಮ ಸುಖಿಯಾಗುತ್ತದೆ. ಈ ಶರೀರ ಧಾರಣೆ ಒಂದು ಛದ್ಮವೇಷವೇ ಸರಿ ! ಇದಕ್ಕೆ ಮಾಯೆಯ ಮರೆವು ಬೇರೆ ! ಬಿಟ್ಟಂತೆ ಕಂಡರೂ ಮತ್ತೆ ಮತ್ತೆ ಅಂಟಿಕೊಳ್ಳುವ ಮಾಯೆ ! ದ್ವಂದ್ವಗಳ ನಡುವಿನ ಬದುಕು ! ಇದರಿಂದ ಹೊರಬರಲು ನಾವು ಪದ್ಮಪತ್ರರಾಗಬೇಕು ! ಮಾಯೆಯ ಬದುಕಿಗೆ ಅಂಟಿಯೂ ಅಂಟದಂತಿರಬೇಕು. ಹೇಳುವುದು ಸುಲಭ ! ಆದರೆ ಆಚರಣೆಗೆ ತರುವುದು ಕಷ್ಟ. ಆದರೆ ಸಾಧನೆಗೆ ಅಸಾಧ್ಯವಾದುದು ಯಾವುದೂ ಇಲ್ಲ. ದೃಢವಾದ, ಅಚಲವಾದ ಮನಸ್ಸಿನಿಂದ ನಿಲ್ಲಬೇಕು ಅಷ್ಟೆ ! ಆಗ ಎಲ್ಲರೂ ಪದ್ಮಪತ್ರರೇ ! ಅಲ್ಲವೇ ಗೆಳೆಯರೇ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)