ಬಲ್ಲೊಡೇಕಿಂತು ಪೇಳ್
ಎಲ್ಲದರೊಳಿರುವವಗೆ ಪಾಲ್ಮೊಸರ ನೈವೇದ್ಯ
ಬಲ್ಲೊಡೇನಾಸ್ತಿ ಹಣ ಭೌತಿಕದ ಕೇಳ್ಕೆ !
ಎಲ್ಲವರಿತರು ಏಕೊ ನಶ್ವರದ ಬೆಮೆ ಕಾಣೆ !
ಬಲ್ಲೊಡೇಕಿಂತು ಪೇಳ್ ಜಾಣಮೂರ್ಖ//
ಭಗವಂತನು ಸರ್ವವ್ಯಾಪಿ ! ಅಣುರೇಣು ತೃಣಕಾಷ್ಠಂಗಳಲ್ಲಿ ಪರಿಪೂರ್ಣ ! ವಿಶ್ವದ ಚರಾಚರ ವಸ್ತುಗಳೆಲ್ಲದರಲ್ಲಿಯೂ ದೇವತೇಜವೇ ತುಂಬಿರುವುದೆಂಬ ಸತ್ಯ ಗೊತ್ತಿದ್ದರೂ ಅವನಿಗೆ ಹಾಲು , ಮೊಸರು , ಹಣ್ಣು ಇತ್ಯಾದಿಗಳ ನೈವೇದ್ಯ ಮಾಡುತ್ತೇವೆ! ಹಣ, ಆಸ್ತಿ ಇವೆಲ್ಲಾ ಚಿರವಲ್ಲ ಎಂದು ಗೊತ್ತಿದ್ದರೂ ಸಹ ಇವನ್ನೇ ಬೇಡುತ್ತೇವೆ ! ಎಲ್ಲ ವೇದಾಂತ ವಿಚಾರಗಳನ್ನು ಮಾತನಾಡುತ್ತೇವಾದರೂ ಮತ್ತೆ ಮತ್ತೆ ನಶ್ವರವಾದುದರ ಭ್ರಮೆಯಲ್ಲಿ ಬಿದ್ದು ತೊಳಲಾಡುತ್ತೇವೆ ! ತಿಳಿದಿದ್ದರೂ ಸಹ ಇಂತಹಾ ಭ್ರಮೆಯಲ್ಲಿ ಬಿದ್ದು ಸತ್ಯದ ಮರೆವೇಕೆ !? ಈ ಮಟ್ಟದಲ್ಲಿ ಪ್ರಾಪಂಚಿಕಕೆಳೆಸಿ ಪಾರಮಾರ್ಥಿಕದ ಕನಿಷ್ಠ ಅರಿವೂ ಇಲ್ಲದವರಂತೆ ಬದುಕುತ್ತಿರುವುದಾದರೂ ಏಕೆ ? ಏನೆನ್ನಬೇಕು ನಮ್ಮ ಈ ಸ್ಥಿತಿಯನ್ನು ! ಅಲ್ಲವೇ ಗೆಳೆಯರೇ !?
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
