ಇಂಧನ ಮತ್ತು ಬಂಡಿ
ಇಂಧನವು ಇರುವನಕ ಬಂಡಿಯೋಡುವುದಲ್ತೆ
ಬಂಧನವದೆಂತದೈ ದೂರ ಪಯಣದೊಳು!
ಇಂಧನವು ಮುಗಿಯಲ್ಕೆ ಪಯಣವೂ ಮುಗಿವುದೈ
ಬಂಧನವ ಕಳೆದು ಬಾಳ್ ಜಾಣಮೂರ್ಖ//
ಇಂಧನವಿರುವ ವರೆಗೆ ಬಂಡಿಯೋಡುತ್ತದೆ. ಅದು ಮುಗಿದೊಡನೆ ಎಲ್ಲಿದೆಯೋ , ಹೇಗಿದೆಯೋ ಹಾಗೆಯೇ ನಿಂತು ಬಿಡುತ್ತದೆ. ಎಂತಹಾ ಬಾಂಧವ್ಯ ಇವೆರಡಕ್ಕೂ ! ಬಂಡಿಯೇನೋ ನಿಂತು ಬಿಡುತ್ತೆ. ಆದರೆ ಪಯಣ ! ಅದು ಮುಗಿದಿರೋದಿಲ್ಲ ! ಸೇರಬೇಕಾದ ಗುರಿ ಮುಟ್ಟಿರೋದಿಲ್ಲ. ಏನು ಮಾಡುವುದು ! ನಡೆದಾದರೂ ಗುರಿ ಮುಟ್ಟಲೇಬೇಕು ತಾನೆ!? ಚಿಂತಿಸುತ್ತಾ ಕುಳಿತುಕೊಳ್ಳಲಾದೀತೆ ? ಹಾಗೆಯೇ ಈ ದೇಹವೆಂಬ ಬಂಡಿಗೆ ಇಂಧನವಾವುದಿರಬಹುದು ಊಹಿಸಿ ಗೆಳೆಯರೇ ! ಆ ಇಂಧನವು ಮುಗಿದೊಡನೆ ಬದುಕಿನ ಪಯಣ ಅಲ್ಲಿಯೇ ನಿಲ್ಲುತ್ತದೆ. ಆದರೆ ಗುರಿ ಮುಟ್ಟಬೇಕಲ್ಲ ! ನಾವು ನಿಲ್ಲಬಾರದು.ಆತ್ಮಶಕ್ತಿಯನ್ನೇ ಇಂಧನವಾಗಿಸಿ ಮುಂದೆ ಸಾಗಿ ಗುರಿ ಮುಟ್ಟಬೇಕು. ಇಂದಲ್ಲ ನಾಳೆ ಇಂಧನ ಮುಗಿದೇ ಮುಗಿಯುವುದೆಂಬ ಖಾತ್ರಿಯಂತೂ ಇದೆ. ಆತ್ಮಶಕ್ತಿಯನ್ನು ಜಾಗೃತಗೊಳಿಸಿಕೊಂಡು ಮುನ್ನಡೆವತ್ತ ಚಿಂತಿಸಬೇಕಿದೆ. ಅಲ್ಲವೇ ಗೆಳೆಯರೇ ?
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
