ಸುಳಿವುದೆಂತೈ ತಿಳಿವು
ಮೊಳೆವುದೇಂ ಹಸನಿರದ ಮೊಳೆವಿತ್ತ ಬಿತ್ತಲದು
ಇಳೆಯಮ್ಮಳೇಂಗೈವಳಿಂತ ವಿತ್ತಿರಲು !
ಅಳಿಮನದಿ ವಿಷಯ ಮೊಳೆವಿತ್ತ ಬಿತ್ತಿರುವಾಗ
ಸುಳಿವುದೆಂತೈ ತಿಳಿವು ಜಾಣಮೂರ್ಖ //
ಹಸನಿಲ್ಲದ ಮೊಳೆವಿತ್ತನ್ನು ಬಿತ್ತಿದರೆ ಅದು ಫಲ ಕೊಡುವುದೇನು ? ಮೊಳಕೆಯೊಡೆಯುವುದೇನು ? ಅದಕ್ಕೆ ಇಳೆಯಮ್ಮಳನ್ನು ದೂರುವುದು ತರವೇನು ? ಹಾಗೆಯೇ ನಮ್ಮ ಮನಸ್ಸು ಕೂಡ. ಅರಿಷಡ್ವರ್ಗಾದಿ ವಿಷಯದ ಮೊಳೆವಿತ್ತನ್ನು ( ಬಿತ್ತನ್ನು) ಬಿತ್ತಿದರೆ ಸುಜ್ಞಾನ ಪ್ರಾಪ್ತಿಯಾಗುವುದಾದರೂ ಹೇಗೆ ? ಮನಸ್ಸಿನಲ್ಲಿ ಸದ್ವಿಚಾರ , ಸದ್ವಿಷಯ , ಸನ್ನಡತೆ , ನಿಸ್ವಾರ್ಥಾದಿ ಫಲದಾಯಕವಾದ ಮೊಳೆವಿತ್ತನ್ನು ಬಿತ್ತಿದರೆ ಅಂತಹಾ ಬೆಳೆಯೇ ಪ್ರಾಪ್ತವಾಗುತ್ತದೆ. ಅದುಬಿಟ್ಟು ಸ್ವಾರ್ಥ , ಮೋಹಾದಿ ವಿಷಯದ ಗಾಟು ತುಂಬಿದ್ದರೆ ತಿಳಿವಿನ ತಳವನ್ನು ಕಾಣುವುದಾದರೂ ಎಂತು ? ಜ್ಞಾನದ ಆನಂದವನ್ನು ಪಡೆಯುವುದಾದರೂ ಎಂತು ? ಅಲ್ಲವೇ ಗೆಳೆಯರೇ ?
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
