ಸದ್ಗುರು

ಸದ್ಗುರು

ಕಲಿ ಮೊದಲು ಕಲಿವುದನು ಗುರುವಾಗುವಾ ಮುನ್ನ
ಕಲಿ ವಿಶ್ವದಾಲಯದೊಳೆಲ್ಲವನುಭವಿಸಿ
ಕಲಿವೊಡೀ ಜಗ ತಾನು ಗುರುವಪ್ಪುದೈ ದಿಟದಿ ಕಲಿಯುತಲೆ ಗುರುವಾಗೊ ಜಾಣಮೂರ್ಖ//

ಗುರು ಎನಿಸಿಕೊಳ್ಳುವುದು ಅಷ್ಟು ಸುಲಭದ ಮಾತಲ್ಲ. ಒಂದು ವಿದ್ಯಾರ್ಹತೆಯ ಮಾನದಂಡದಿಂದ ಇಂದು ಶಿಕ್ಷಕರ ಹುದ್ದೆಗೇರಬಹುದಷ್ಟೆ. ಆದರೆ ಗುರು ಎಂಬ ಸ್ಥಾನ ಹುದ್ದೆಯಲ್ಲ ! ಅದೊಂದು ಉತ್ಕೃಷ್ಟವಾದ , ದೈವೀಕವಾದ ಸ್ಥಾನ. ವಿದ್ಯಾರ್ಹತೆಯನ್ನು ಎಲ್ಲರೂ ಪಡೆಯಬಹುದಾದರೂ ಆ ಸ್ಥಿತಿಗೆ, ಆ ಎತ್ತರಕ್ಕೆ ಏರುವುದು ಬಹು ಕಷ್ಟ. ಗುರುವಾಗಬೇಕಾದರೆ ಈ ವಿಶ್ವದ ಆಲಯದಲ್ಲಿ ನಾವು ಮೊದಲು ವಿದ್ಯಾರ್ಥಿಗಳಾಗಬೇಕು. ಕಲಿವುದನ್ನು ಚನ್ನಾಗಿ ಕಲಿಯಬೇಕು. ಜೀವನ ಪರ್ಯಂತ ಕಲಿಯೋದು ಇದ್ದೇ ಇದೆ ಎಂಬ ಸತ್ಯವನ್ನು ಅರಿಯಬೇಕು. ಕಲಿವುದೆಲ್ಲವನ್ನೂ ಅನುಭವಿಸಿ ಕಲಿತು ಅನುಭಾವಿಯಾಗಬೇಕು. ಹಾಗೆ ಕಲಿಯಲು ಹೊರಟವನಿಗೆ ಈ ಜಗತ್ತೇ ಅದ್ವಿತೀಯ, ಶ್ರೇಷ್ಠ ಗುರುವಾಗಿಬಿಡುತ್ತದೆ. ಈ ಜಗದ ಮಡಿಲಲ್ಲಿ ಕಲಿಯುತ್ತಾ , ಕಲಿಯುತ್ತಾ ಗುರುವಾಗಬೇಕು ! ಶ್ರದ್ಧೆಯಿರಬೇಕು. ” ಶ್ರದ್ಧಾವಾನ್ ಲಭತೇ ಜ್ಞಾನಂ ” ಎಂದು ಗೀತೆಯಲ್ಲಿ ಭಗವಂತ ಸಾಕ್ಷಾತ್ ಶ್ರೀಕೃಷ್ಣನೇ ಉಪದೇಶಗೈದಿಲ್ಲವೇ ? ಆದರೆ ಪಠ್ಯಪುಸ್ತಕದ ಅರಿವಷ್ಟೇ ಅದರ ವ್ಯಾಪ್ತಿಯಲ್ಲ ! ಅದರ ವ್ಯಾಪ್ತಿ ಅನಂತವಾದದ್ದು ! ಎಂಬ ದಿವ್ಯ ಸತ್ಯವನ್ನರಿತು ಬದುಕುವವನೇ , ಅರಿವನ್ನು ಹಂಚುವವನೇ ಹಾಗೆಯೇ ಬದುಕ ಕೊಡುವವನೇ ನಿಜವಾದ ಗುರುವಾಗುತ್ತಾನೆ ! ಅಲ್ಲವೇ ಗೆಳೆಯರೇ ?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)