ಮಂದಿ ಮರೆವರೊ ಜಾಡ

ನೊಂದವನ ಕಂಡು ಮಿಗೆ ನೋವ ನೀಳ್ಪುದು ವಿಕೃತಿ
ಬಂದು ಹೆಗಲಿತ್ತು ಸಂತೈಸುವುದೆ ಸುಕೃತಿ
ಕಂದಿ ಕುಂದಿದನಿಲ್ಲಿ ನೀನೊಬ್ಬನೇನಲ್ಲ
ಮಂದಿ ಮರೆವರೊ ಜಾಡ ಜಾಣಮೂರ್ಖ //

ಈ ಜಗತ್ತೇ ಹೀಗೆ ಗೆಳೆಯರೇ , ಒಬ್ಬ ತುಂಬಾ ನೊಂದಿದ್ದಾನೆ ಎಂದರೆ ಅವನಿಗೆ ಮತ್ತಷ್ಟು ನೋವಿತ್ತು , ನಕ್ಕು ಅಣಕಿಸಿ ಕೆಣಕಿ ವಿಕೃತಾನಂದ ಪಡೆವವರೇ ಇಲ್ಲಿ ಹೆಚ್ಚಿದ್ದಾರೆ. ಇದೇ ವಿಕೃತಿ. ಆದರೆ ನೊಂದವನ ನೋವಿಗೆ ಹೆಗಲು ಕೊಟ್ಟು ಸಂತೈಸುವುದೇ ಸುಕೃತಿ. ಓ ಗೆಳೆಯಾ , ಈ ನೋವು ನಿನ್ನೊಬ್ಬನದೇ ಅಲ್ಲ ! ಎಲ್ಲರೂ ಬಾಳ ಬೇಗೆಯಲ್ಲಿ ನೊಂದವರೇನೇ ! ಆದರೆ ಅವರು ತಾವು ನಡೆದು ಬಂದ ಜಾಡನ್ನು , ಹೆಜ್ಜೆ ಗುರುತುಗಳನ್ನು ಬಹು ಬೇಗ ಮರೆತೇ ಬಿಡುತ್ತಾರೆ. ಮೂಕಪ್ರಾಣಿಯೋ , ಪಕ್ಷಿಯೋ ಮತ್ತೊಂದು ಪ್ರಾಣಿಗೋ , ಪಕ್ಷಿಗೋ ಒದಗಿದ ದುರ್ಗತಿಯನ್ನು ಕಂಡು ಕರುಳು ಮಿಡಿಯುತ್ತದೆ. ಆದರೆ ಈ ಮಾನವ ಪ್ರಾಣಿ ಇದ್ದಾನಲ್ಲಾ ! ಮೀರಿದ ಸ್ವಾರ್ಥ ಇವನಿಗೆ ! ತಾನು ನಡೆದು ಬಂದ ಹೆಜ್ಜೆ ಗುರುತುಗಳನ್ನು ಮರೆತೇ ಬಿಡುತ್ತಾನೆ. ತಾನಿದ್ದುದೇ ಹೀಗೆ , ಮುಂದೆ ಇರುವುದೂ ಹೀಗೆಯೇ , ಇದೇ ಶಾಶ್ವತ ಎಂಬ ಭ್ರಮೆಯಲ್ಲೇ ಬದುಕುತ್ತಾನೆ ! ದಾಸರ ನುಡಿಯಂತೆ ಮಾನವ ಜನ್ಮವೇನೋ ದೊಡ್ಡದೇ , ಆದರೆ ಇದೆಂತಹಾ ಸಣ್ಣತನ !! ಎಂತಹಾ ವಿಪರ್ಯಾಸವಲ್ಲವೇ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)