ಕಮ್ಮಿತ್ತು ಬದುಕೇಳು

ಬೊಮ್ಮ ಭವಿತವ್ಯ ತಾ ಬೊಮ್ಮ ಗೌಪ್ಯವದಿರಲು
ಸುಮ್ಮನೆಯೆ ಬೆದಕಿ ಬಲು ಉಬ್ಬೆಗವದೇಕೆ ?
ಹಮ್ಮಯಿಸಿ ಕೊರಗುವವೆ ಖಗಮೃಗಾದಿಗಳೆಲ್ಲ
ಕಮ್ಮಿತ್ತು ಬದುಕೇಳೊ ಜಾಣಮೂರ್ಖ//

ಬಹುಶಃ ಭವಿಷ್ಯವನ್ನು ನೆನೆನೆನೆದು ತುಂಬಾ ಉದ್ವೇಗಕ್ಕೆ ಒಳಗಾಗುವ ಪ್ರಾಣಿ ಮನುಷ್ಯ ಮಾತ್ರ ಅನ್ನಿಸುತ್ತೆ. ಬ್ರಹ್ಮ ಭವಿತವ್ಯವು ಬ್ರಹ್ಮನಷ್ಟೇ ಸತ್ಯವೂ ಹೌದು ! ಗೌಪ್ಯವೂ ಹೌದು ! ಖಗಮೃಗಾದಿಗಳು (ಪಕ್ಷಿಗಳು ಪ್ರಾಣಿಗಳು) ಬಹು ನಿಶ್ಚಿಂತೆಯಿಂದ ಬದುಕುತ್ತವೆ. ನಾವು ಮಾತ್ರ ನಮ್ಮ ಭವಿತವ್ಯ ಹಾಗಿರಬೇಕು , ಹೀಗಿರಬೇಕು ಅಂತ ಕನಸು ಕಟ್ಟಿಕೊಳ್ಳುತ್ತೇವೆ ! ಮತ್ತು ನನಸಿಗಾಗಿ ಪರಿತಪಿಸುತ್ತೇವೆ. ಬರೀ ಉದ್ವೇಗದಲ್ಲೇ ಬದುಕಿ ಭವಿಷ್ಯದ ಚಿಂತೆಯಲ್ಲಿ ಸುಂದರವಾದ ವರ್ತಮಾನವನ್ನು ಚಿಂತೆಯಲ್ಲೇ ದೂಡುತ್ತೇವೆ ಮತ್ತು ಕಳೆದುಕೊಳ್ಳುತ್ತೇವೆ. ಮೈಮರೆತು ಕೊರಗಿ ಕಂದಿ ಕೃಷರಾಗಿ ಹೋಗುತ್ತೇವೆ. ಇಂತಹಾ ಬದುಕಾದರೂ ಏಕೆ !? ಬದುಕಿನ ಸಾರವನ್ನು ಸವಿದು, ಅದರ ಸವಿಯನ್ನು ಇತರರಿಗೂ ಹಂಚಿ , ಪಸರಿಸಿ ಬದುಕೋಣ. ಬದುಕನ್ನು ಅನುಭವಿಸಿ ಸಂಭ್ರಮಿಸೋಣ ! ಆಗ ಬದುಕು ಸುಂದರ ! ಸುಮಧುರ ಸಂತಸಮಯ ಅಲ್ಲವೇ ಗೆಳೆಯರೇ ?
( ಕಮ್ಮು+ಇತ್ತು=ಕಮ್ಮಿತ್ತು
ಕಮ್ಮು ಎಂದರೆ ಪರಿಮಳ / ಇತ್ತು ಎಂದರೆ ನೀಡು ಎಂದರ್ಥ.)

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)