ಕರ್ಮ ಸವೆಯದ ಮೇಲೆ

ಕನವರಿಸಿ ಕನವರಿಸಿ ಬಿದ್ದರೇನಡಿಗಡಿಗೆ
ಕನವರಿಕೆ ಕಳೆಯದಿರಲೇನಿದ್ದರೇನು?
ಮನುಜತ್ವ ಮರೆತು ಬಾಳ್ನಿದಿರೆಯೊಳ್ದೂಡೆ ತಾ
ಕೊನೆ ಮೊದಲದೆಲ್ಲಿಯದೊ ಜಾಣಮೂರ್ಖ//

ಇಂದು ನಮ್ಮ ಬದುಕೇ ಹೀಗಾಗಿ ಬಿಟ್ಟಿದೆ ನೋಡಿ. ಲೌಕಿಕ ಭೋಗ ಭಾಗ್ಯಗಳ ಕನವರಿಕೆ ಬಹುವಾಗಿಬಿಟ್ಟಿದೆ. ಮತ್ತೆ ಮತ್ತೆ ಅವೆಲ್ಲವೂ ಕ್ಷಣಿಕವೆಂದು ಗೊತ್ತಾದರೂ ಸಹ ಮತ್ತೆ ಮತ್ತೆ ಅದೇ ಮಾಯಾ ಕೂಪದಲ್ಲೇ ಬೀಳುತ್ತೇವೆ , ನೋಯುತ್ತೇವೆ , ಮತ್ತೆ ಬೀಳುತ್ತೇವೆ ! ಏನಿದ್ದರೆ ಏನು ಈ ಕನವರಿಕೆ ಕಳೆಯದಿದ್ದರೆ ! ಈ ಬಾಳೇನು ಎಚ್ಚರವಾಗದ ನಿದಿರೆಯೇನು !? ಎಚ್ಚರಗೊಂಡರೂ ಮತ್ತದೇ ನಿದಿರೆ ! ಮಂಪುರು ! ಮನುಷ್ಯತ್ವವನ್ನು ಮರೆತು ನಿದಿರೆಯಲ್ಲೇ ಕಳೆದರೆ ಇದಕ್ಕೆ ಕೊನೆಮೊದಲೆಲ್ಲಿಯದು !? ಮತ್ತದೇ, ಪುನರಪಿ ಜನನಂ ಪುನರಪಿ ಮರಣಂ ! ಕರ್ಮ ಸವೆಯದ ಮೇಲೆ ಮತ್ತೇನು ಮಾಡುವುದು ಅಲ್ಲವೇ !? ಇನ್ನಾದರೂ ನಿದಿರೆಯಿಂದ ಎಚ್ಚೆತ್ತು ಸನ್ನಡತೆ , ಸಚ್ಚಾರಿತ್ರ್ಯಗಳಿಂದ ಮುಕ್ತಿ ಮಾರ್ಗದ ಮೆಟ್ಟಿಲನ್ನು ಏರುತ್ತಾ ಸಾಗಬೇಕಲ್ಲವೇ ಗೆಳೆಯರೇ ! ಅದಕ್ಕೆ ಬಿಡಬೇಕಲ್ಲ ಈ ಮಾಯೆ ! ಅದಕ್ಕೇ ಆದಿ ಶಂಕರಾಚಾರ್ಯರು ಇಹ ಸಂಸಾರೇ ಬಹು ನಿಸ್ಸಾರೇ ! ಎಂದಿದ್ದಾರೆ ! ಈ ಮಾತು ಕಟು ಸತ್ಯವೇ ಹೌದು. ಇನ್ನಾದರೂ, ಇಷ್ಟು ನೋವು ತಿಂದ ಮೇಲಾದರೂ ಮಾನವರಾಗಿ ಬದುಕಬೇಕಿದೆ. ಅಲ್ಲವೇ ಗೆಳೆಯರೇ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)