ಮೃಡತತ್ತ್ವವರಿತಿರಲು !

ಕೊಡದ ಕಡವರ ಬಿಟ್ಟು ಒಡೆವ ಕುಳವರಸುವರೆ?
ಒಡನಿರುವ ಮದ್ದ ಬಿಟ್ಟಡವಿಯಲಯುವರೆ?
ಮೃಡತತ್ತ್ವವರಿತಿರಲು ಮಡಿಮಂತ್ರ ಗೊಡವೆಯೇ
ಕೊಡಲ ಶಿವನರಿಯೇಳೊ ಜಾಣಮೂರ್ಖ //

ಈಗ ನಮಗೊಂದು ಕೊಡದಷ್ಟು ನಿಧಿ ಸಿಕ್ಕಿದೆ ಎಂದಿಟ್ಟುಕೊಳ್ಳೋಣ. ಕೊಡವನ್ನು ಭದ್ರ ಮಾಡುತ್ತೇವೋ ಅಥವಾ ಕೊಡವನ್ನು ಅಲ್ಲೇ ಬಿಟ್ಟು ಅದನ್ನು ಒಡೆವ ಕುಳವನ್ನು ಹುಡುಕುತ್ತಾ ಸಾಗುತ್ತೇವೋ !?
ಹಾಗೆಯೇ ನಮ್ಮ ಕಾಯಿಲೆಗೆ ಮದ್ದು ಅಂಗೈಲೇ ಇರುವಾಗ ಯಾರಾದರೂ ಗಿಡಮೂಲಿಕೆ ಅರಸಿ ಕಾಡಿಗೆ ಹೋಗುತ್ತಾರೆಯೇ ?
ಮಡಿ , ಮಂತ್ರಗಳಿಗೆ ಅತೀತನಾದವನು ಆ ಭಗವಂತ ಎಂಬ ಮೃಡತತ್ತ್ವವು ತಿಳಿದ ಮೇಲೂ ಮಡಿ ಮಂತ್ರದ ಗೊಡವೆಯೇ ! ಓ ಗೆಳೆಯಾ, ನಮ್ಮಲ್ಲೇ ಒಂದಾಗಿದ್ದು , ಚೈತನ್ಯಸ್ವರೂಪಿಯಾದ ಆ ಭಗವಂತನನ್ನು ಎಲ್ಲೆಲ್ಲೋ ಹುಡುಕುವುದಾದರೂ ಏಕೆ ? ಸ್ವಲ್ಪ ಶಾಂತವಾಗಿ ಹುಡುಕಿದರೆ ನಿನ್ನಲ್ಲಿಯೇ ಸಿಕ್ಕಿಬಿಡುತ್ತಾನವನು. The kingdom of god within you ! ದೇವರ ಸಾಮ್ರಾಜ್ಯ ನಿನ್ನೊಳಗೇ ಇದೆ ! ಇನ್ನಾದರೂ ಅದನ್ನು ಕಾಣೇಳಯ್ಯಾ ಗೆಳೆಯ !

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)