ಹೊರತಾರು ವಿಧಿಗೆ ಪೇಳ್
ಮರಣವನು ಗೆದ್ದೊಡೇನಮೃತ ಪಾನವಮಾಡಿ ಸುರರರಸುವಾದೊಡೇನಾಳದಿರೆ ಮನವ
ನರಳಲಿಲ್ಲವೆ ಎಲ್ಲ ಭವದಬಂಧನದೊಳಗೆ ಹೊರತಾರು ವಿಧಿಗೆ ಪೇಳ್ ಜಾಣಮೂರ್ಖ //
ಸಮುದ್ರ ಮಂಥನದ ಕಾಲದಲ್ಲಿ ಉದಯಿಸಿದ ಅಮೃತವನ್ನು ಕುಡಿದವರೆಲ್ಲರೂ ಅಮರರಾದರಷ್ಟೆ ! ಸಾವನ್ನು ಗೆದ್ದರು ! ಭವದ ಬಂಧನವನ್ನೇನೂ ಗೆಲ್ಲಲಿಲ್ಲ! ಕೋಪ ತಾಪಗಳನ್ನು ಗೆಲ್ಲಲಿಲ್ಲ ! ತಮ್ಮ ಮನಸ್ಸನ್ನೇ ತಾವು ಗೆಲ್ಲಲಾಗಲಿಲ್ಲ ! ಇಂದ್ರನಾಗಲಿ , ಚಂದ್ರನಾಗಲಿ ! ಎಲ್ಲರೂ ಭವಬಂಧನದಲ್ಲಿ ಸಿಲುಕಿ ನರಳಿದವರೇನೇ ! ವಿಧಿಗೆ ಯಾರೂ ಹೊರತಲ್ಲ . ಹೇಗೋ ಅಮೃತಪಾನ ಮಾಡಿ ಸಾವು ಗೆದ್ದರಾಗದು ! ಮನಸ್ಸನ್ನು ಗೆಲ್ಲಬೇಕು ! ಮನಸ್ಸು ಹೇಳಿದಂತೆ ನಾವು ಕೇಳಬಾರದು, ನಾವು ಹೇಳಿದಂತೆ ಮನಸ್ಸು ಕೇಳುವಂತಾಗಬೇಕು. ಸತ್ಯಪಥವನ್ನು ಬಿಡದಿದ್ದಾಗ ಪರಮಪದವೇ ಲಭಿಸೀತು. ಎಂತಹಾ ಸ್ಥಿತಿಯೇ ಬಂದರೂ ಮನದ ಸ್ವಾಸ್ಥ್ಯ ತಪ್ಪಬಾರದಷ್ಟೆ. ತಪ್ಪಿದರೆ ಮುಗಿಯಿತು ಮತ್ತದೇ ಭವದ ಬಂಧನದಾಟ. ಮಾಗುವವರೆಗೆ ಮುಗಿಯದು ಇದರ ಕಾಟ ! ಅಲ್ಲವೇ ಗೆಳೆಯರೇ !?
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
