ಕಾಣೇಳು ದೇವನನು

ಬಾಳ ಹಣ್ಗೈದದರ ಸವಿಯ ದೇವನಿಗಿಕ್ಕು
ಕೂಳಿಕ್ಕಿ ತಣಿಸು ಮಿಗೆ ನೀರಿತ್ತು ಹರಸು
ಏಳೇಳು ಲೋಕದೊಳಗೀ ತಣಿವೊಳಿಹ ದೇವ
ಏಳು ಕಾಣೇಳವನ ಜಾಣಮೂರ್ಖ//

ಬಾಳನ್ನು ಹಣ್ಣಾಗಿಸೋದು ಅಂದರೆ ಮನಸ್ಸನ್ನು ಆಮೇಲೆ ಬುದ್ಧಿಯನ್ನು ತನ್ಮೂಲಕ ನಮ್ಮ ವರ್ತನೆಗಳನ್ನು ಹಣ್ಣಾಗಿಸೋದು, ಪಕ್ವಗೊಳಿಸೋದು ಎಂದರ್ಥ. ಆಗ ನಮ್ಮ ಬದುಕು ಅಕ್ಷರಶಃ ಹಣ್ಣಾಗುತ್ತೆ. ಅದರ ಸವಿಯನ್ನು ದೇವನಿಗಿತ್ತು ನಲಿಯಬೇಕು ! ಏನು ಅದನ್ನು ಸವಿಯಲು ಭಗವಂತ ಬರುವನೇನು ! ಎಂದು ಅಚ್ಚರಿಗೊಳ್ಳುವಿರೇನು ? ಖಂಡಿತ ಬರುತ್ತಾನೆ. ಆದರೆ ನಮಗೆ ಅವನನ್ನು ಕಾಣುವ ಕಣ್ಣು ಬೇಕಷ್ಟೆ. ಅದಕ್ಕೂ ಮೊದಲು ನಾವು ಅರ್ಥಾತ್ ನಮ್ಮ ಮನಸ್ಸು ಹಣ್ಣಾಗಬೇಕಿದೆ. ಈಗ ನೀವೇ ನೋಡಿ ಆ ದೇವನು ಹೇಗಿರುತ್ತಾನೆ ಅಂತ. ಹಸಿದು ಬಂದವರಿಗೆ ಅನ್ನ ನೀರಿಟ್ಟು ಅವರ ಹಸಿವನ್ನು ನೀಗಿ. ಅವರಿಗೆ ಒಳಿತಾಗಲೆಂದು ಪ್ರೀತಿಯಿಂದ ಹೃತ್ಪೂರ್ವಕವಾಗಿ ಹರಸಿ , ಹಾರೈಸಿ. ಅವರಲ್ಲಿ ಹಸಿವು ತೃಷೆಯಾರಿದ ಮೆಲೆ ಕಾಣುವ ತೃಪ್ತ ಭಾವವನ್ನು ನೋಡಿ ! ಆ ಸಂತೃಪ್ತ ಭಾವವಿದೆಯಲ್ಲಾ ಅದರಲ್ಲಿರುತ್ತಾನೆ ಭಗವಂತ ! ಏಳೇಳು ಲೋಕದಲ್ಲೂ ಸಹ ಭಗವಂತನನ್ನು ಎಲ್ಲೆಲ್ಲೋ ಹುಡುಕುತ್ತಾರೆ ಜನ. ಆದರೆ ನಾವು ಹರಿಸುವ ಪ್ರೀತಿಯಲ್ಲಿ ,ತ್ಯಾಗದಲ್ಲಿ , ನಿರಪೇಕ್ಷಣೀಯವಾದ ಸೇವೆಯಲ್ಲಿ ಭಗವಂತನನ್ನು ಕಾಣಬೇಕು. ಅದು ಬಿಟ್ಟು ಗುಡಿ, ಮಸೀದಿ , ಚರ್ಚ್ ಬೇರೆಲ್ಲೆಲ್ಲೋ ಅರಸಿದರೆ ಅವನ ಮೂರ್ತಿಯನ್ನು ನೋಡಬಹುದಷ್ಟೆ ಈ ಚರ್ಮಚಕ್ಷುವಿನಿಂದ. ನಮ್ಮ ಆತ್ಮಚಕ್ಷುವಿಗೆ ಅವನು ಕಾಣಬೇಕೆಂದರೆ ಪ್ರೀತಿ , ತ್ಯಾಗ ಹಾಗೂ ನಿಸ್ವಾರ್ಥ , ನಿರಪೇಕ್ಷಣೀಯವಾದ ಸೇವೆಯಿಂದ ಮಾತ್ರವೇ ಸಾಧ್ಯ. ಹಾ, ಇನ್ನೊಂದು ವಿಷಯ. ಕೇವಲ ಅವನನ್ನು ನೋಡೋದಕ್ಕಾಗಿ ಜಗವನ್ನು ಪ್ರೀತಿಸಿದರೆ , ತ್ಯಾಗಗೈದರೆ , ಸೇವೆಗೈದರೆ ಅದು‌ ನಿಜಕ್ಕೂ ನಿರರ್ಥಕ. ಬದುಕಲ್ಲಿ ದೇವನಿರುವಿಕೆಯನ್ನು ಅನುಭವಿಸಬೇಕು. ಅದಕ್ಕಾಗಿ ಈ ಎಲ್ಲಾ ಮೌಲ್ಯಗಳ ಅನುಷ್ಠಾನವಾಗಬೇಕು. ಆಗ ನೋಡಿ, ಅಲ್ಲಿದೆ ನೋಡಿ ಭಗವದಾನಂದ. ಏಳಿ ಗೆಳೆಯರೇ ಮತ್ತೇಕೆ ತಡ ! ಆ ಭಗವಂತನ ದಿವ್ಯಾನುಭವವನ್ನು ಅನುಭವಿಸಲು ಸನ್ನದ್ಧರಾಗಿ !

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)