ಒಡಲಕಿಚ್ಚು

ಕಡಲ ಕಿಚ್ಚಿಗು ಮಿಗಿಲು ಒಡಲ ಕಿಚ್ಚಿದು ನೋಡ
ಸುಡುವುದೈ ತನು ಮನವ ಕಡೆತನಕ ಬಿಡದೆ
ಎಡೆಯೆಲ್ಲ ಭಸ್ಮವೈ ನಡುಗಿದರು ನರಸುರರು
ಮೃಡನೆ ಬೇಡಿದ ಬಿಕ್ಕೆ ಜಾಣಮೂರ್ಖ//

ಕಡಲ ಕಿಚ್ಚನ್ನು ಬಡಬಾಗ್ನಿ ಎನ್ನುತ್ತಾರೆ. ಅದು ಪ್ರಳಯಾಗ್ನಿಯೇ ಸರಿ. ಆದರೆ ಈ ಒಡಲ ಕಿಚ್ಚಿದೆಯಲ್ಲಾ ಅದಕ್ಕಿಂತಲೂ ಒಂದು ಕೈ ಹೆಚ್ಚು! ಎರಡು ತರಹದ ಕಿಚ್ಚಿದೆ ನಮ್ಮಲ್ಲಿ ! ಒಂದು ದೈಹಿಕವಾದದ್ದು, ಇನ್ನೊಂದು ಮಾನಸಿಕವಾದದ್ದು. ದೈಹಿಕವಾದದ್ದು ನಮ್ಮ ತುತ್ತಿನ ಚೀಲಕ್ಕೆ ಏನನ್ನೇ ತುಂಬಿದರೂ ಭಸ್ಮಗೈಯ್ಯುತ್ತದೆ. ಮತ್ತೊಂದು ತಮಣೆಯೇ ಆಗದು ! ನಿತ್ಯ ಹೊಗೆಯಾಡುತ್ತಲೇ ಇರುತ್ತದೆ. ಮನಸ್ಸನ್ನು ಸುಡುತ್ತಲೇ ಇರುತ್ತದೆ. ಎಲ್ಲವೂ ಈ ಮನದ ಬಡಬಾಗ್ನಿಗೆ ಆಹುತಿ ! ನರರ ಮಾತು ಹಾಗಿರಲಿ ಸುರರೂ ಸಹ ಇದರ ಜ್ವಾಲೆಗೆ ಸಿಕ್ಕು ನರಳಿ ಹೋದರು. ಇಂದ್ರದೇವನೇನು ! ಚಂದ್ರದೇವನೇನು ! ಬ್ರಹ್ಮರ್ಷಿ ವಿಶ್ವಾಮಿತ್ರರಾದಿಯಾಗಿ ಇದರ ಉರಿಗೆ ತುತ್ತಾಗದವರೇ ಇಲ್ಲ. ಇದೇನು ಸಾಮಾನ್ಯವಾದ ಬೆಂಕಿಯಲ್ಲ ! ಅರಿಷಡ್ವರ್ಗಗಳ ಬೆಂಕಿ , ಅಷ್ಟಮದಗಳ ಬೆಂಕಿ. ಇದರ ಉರಿಯಲ್ಲಿ ಬೇಯದವನೊಬ್ಬನನ್ನು ತೋರಿಸಿ ನೋಡೋಣ ! ಸಾಕ್ಷಾತ್ ಶಿವನೇ ಭಿಕ್ಷಾಪಾತ್ರೆ ಹಿಡಿಯುವಂತಾಯ್ತು ! ಇನ್ನು ನಾವೆಲ್ಲಾ ಯಾವಲೆಕ್ಕ ! ಹಾ, ಈಗ ವಿಷಯಕ್ಕೆ ಬರುತ್ತೇನೆ. ಇಷ್ಟು ದಿನ ನಾವೂ ಸಹ ಬೆಂದಿದ್ದಾಯ್ತು. ಹಸಿವಿನ ಬೆಂಕಿ ಇದ್ದದ್ದೇ ಬಿಡಿ. ಅದಕ್ಕೇನೂ ದಾರಿಯಿಲ್ಲ. ಆದರೆ ಇನ್ನಾದರೂ ಮಾನಸಿಕವಾದ ಈ ಒಡಲ ಕಿಚ್ಚಿನ ಉರಿಯಿಂದ ದೂರವಿರೋಣವೇ ? ಶಾಂತವಾಗಿ ಯೋಚಿಸಿ. ಪ್ರಯತ್ನಿಸಿ. ಸಾಧಕರಾಗಬೇಕಿದೆ ನಾವು! ಇದನ್ನು ಸಾಧಿಸುವ ಪಥದಲ್ಲಿ ಸಾಗುವವರಿಗೆ ಭಗವಂತನ ಅನುಗ್ರಹವಿದ್ದೇ ಇರುತ್ತದೆ. ಅಲ್ಲವೇ ಗೆಳೆಯರೇ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)