ಭಯಕೃತ್ ಭಯನಾಶನಃ

ಭಯವಿತ್ತು ಬಲವಿತ್ತು ಚಿಂತೆಯಿತ್ತಂತೆ ಮಿಗೆ
ಲಯದ ಅರಿವನ್ನಿತ್ತು ಮಾಯೆಯಂ ಬಿಟ್ಟು
ದಯೆಯಭಯವಿತ್ತು ತಾ ಭವಿತವಂ ಮುಚ್ಚಿಟ್ಟು
ನಿಯತಿ ನೋಳ್ಪುದುಮೇಕೊ ಜಾಣಮೂರ್ಖ//

ಸೂಕ್ಷ್ಮವೂ , ಗೌಪ್ಯವೂ ಮತ್ತೆ ಅಪಾರವೂ ಆದ ಈ ದಿವ್ಯ ಭವ್ಯ ಸೃಷ್ಟಿ ರಹಸ್ಯವು ಯಾರಿಗೂ ತಿಳಿಯುತ್ತಿಲ್ಲ ! ತಿಳಿದವರು ಸುಮ್ಮನಿದ್ದಾರೆ ! ಇದು ಹೇಗಿದೆ ನೀವೇ ನೋಡಿ….. ಈ ಬದುಕಿನಲ್ಲಿ ನಮಗೆ ಮುಂದೇನೋ ಎಂಬ ಒಂದು ಅಜ್ಞಾತ ಭಯವಿದೆ ! ಜೊತೆಗೆ ಏನೇ ಬಂದರೂ ಎದುರಿಸೋ ಬಲವೂ ಇದೆ ! ಜೊತೆಜೊತೆಗೆ ಚಿಂತೆಯೂ ಇದೆ ! ಈ ಚಿಂತೆಗೆ ಕೊನೆಯಿರದು ಬಿಡಿ. ಜೀವ ಇರೋ ವರೆಗೂ ಚಿಂತೆ ! ಇದೇ ಬಿಡದ ಮಾಯೆ ! ಈ ಜಗತ್ತು ನಶ್ವರ, ಎಲ್ಲವೂ ನಾಶವಾಗುತ್ತದೆ , ತಾನೂ ಉಳಿಯುವುದಿಲ್ಲವೆಂಬ ಅರಿವಿದೆ ! ಆದರೂ ಆಸೆ , ತನ್ನದೆಂಬ ಸ್ವಾರ್ಥ, ಅಹಂಕಾರ , ಮಮಕಾರ , ರಾಗದ್ವೇಷಾದಿ ಭಾವಗಳು ವಿಚಿತ್ರವೆನಿಸುವುದಿಲ್ಲವೇ !? ಈ ಬದುಕೂ ಕೂಡ ಹಾಗೇ ಇದೆ. ಭಯ ಬರುತ್ತೆ ಹೋಗುತ್ತೆ ! ಏನೋ ಪರಿಹಾರವಂತೂ ಸಿಕ್ಕುತ್ತೆ. ಮತ್ತದೇ ಬದುಕು ! ಮತ್ತೊಂದು ಭಯ , ಚಿಂತೆ ಮತ್ತೆ ಪರಿಹಾರ ! ಭಯಕೃತ್ ಭಯನಾಶನಃ ಭಯ ಕೊಟ್ಟ ಶಕ್ತಿಯೇ ಭಯವನ್ನು ಕಳೆವ ಅಭಯವನ್ನೂ ನೀಡುತ್ತಿದೆ. ಆದರೆ ಮುಂದಾಗುವುದನ್ನು ಮಾತ್ರ ಗೌಪ್ಯವಾಗಿಟ್ಟಿದೆ ಅಷ್ಟೆ. ಆದರೆ ಆಗುವುದೆಲ್ಲಾ ಒಳ್ಳೆಯದೇ ಆಗುತ್ತದೆ. ನಮ್ಮಲ್ಲಿ ಕೆಟ್ಟದ್ದಿದ್ದರೆ ಘಟಿಸುವುದೂ ಕೆಟ್ಟದ್ದೇ ಆಗಿರುತ್ತದೆ. ಆದರೆ ಅಂತಿಮ ಪರಿಣಾಮ ಒಳ್ಳೆಯದೇ ! ಚಿಂತಿಸದಿರಿ ಗೆಳೆಯರೇ. ಹಾಗೇ ನಮ್ಮ ಬದುಕು ನಡೆದುಬಂದ ಜಾಡನ್ನು ಗಮನಿಸಿ ! ನಿಮಗೇ ತಿಳಿಯುತ್ತದೆ. ಆದರೆ ವಿಧಿಯ ಆಟ ಏಕೆ ಹೀಗೆಂಬುದೆನ್ನುವುದೇ ರಹಸ್ಯವಾಗಿದೆ. ನೇಪಥ್ಯದಲ್ಲಿ ನಿಂತು ಎಲ್ಲವನ್ನು ನೋಡುತ್ತಾ , ಆಡಿಸುತ್ತಿರುವ ಸೂತ್ರಧಾರನ ಉದ್ದೇಶವೇನಿರಬಹುದು ?! ಏನೇನಕ್ಕೋ ತಲೆ ಕೆಡಿಸಿಕೊಳ್ಳದೇ ಈ ವಿಷಯವನ್ನು ಚಿಂತಿಸಬೇಕಿದೆ! ಅಲ್ಲವೇ ಗೆಳೆಯರೇ ?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)