ಒಂದು ದಿನದಾ ಪ್ರೀತಿಯೇನಿದು
ಅಮ್ಮ ನಿನ್ನನು ಸ್ಮರಿಸಲು !
ದಿನವು ದಿನವೂ ನಿನ್ನ ದಿನವೇ
ನಿನ್ನ ತ್ಯಾಗವ ನೆನೆಯಲೂ//
ಹೊತ್ತೆ ಹೆತ್ತೇ ಸಾಕಿ ಸಲಹಿದೆ
ಪ್ರೇಮವಾಹಿನಿ ಹರಿಸಿದೆ
ಮುತ್ತನೀಯುತ ಮಮತೆಯಿಂದಲಿ
ತುತ್ತನಿಕ್ಕುತ ಸಲಹಿದೆ//
ತಪ್ಪಗೈಯ್ಯಲು ಒಪ್ಪದಿಂದಲಿ
ತಿದ್ದಿ ತೀಡುತ ಹರಸಿದೆ
ಸಪ್ಪಗಿರೆ ನಾ ಅಪ್ಪಿ ಒಲವಲಿ
ಒಪ್ಪುವಾ ಕತೆ ಹೇಳಿದೆ//
ಮಾತಿನೊಳಗೇ ಧೈರ್ಯನಿಧಿ ನೀ
ಕೃತಿಗೆ ನೀ ಅನ್ವರ್ಥವು
ಸತ್ಯ ಪಥಕೇ ದಾರಿ ನೀ ನಿಜ
ಮತ್ತೆ ಜೀವನದರ್ಥವು//
ಚಣಚಣವು ನೀ ಮನದಿ ತುಂಬಿರೆ
ಮಾತೆಯಾ ದಿನವೇತಕೆ ?
ನಿನ್ನ ಮಡಿಲೇ ಸಗ್ಗವಾಗಿರೆ
ಬೇರೆ ಸಗ್ಗವದೇತಕೆ ?
ಅಮ್ಮ ನಿನ್ನಯ ಮಡಿಲೊಳಾಡಿದ
ಗಳಿಗೆಯೇತಕೆ ಬಾರದೋ !
ನಿನ್ನ ಪ್ರೇಮದ ಜೋಗುಳವ ನಾ
ಕೇಳೆ ಜೀವನ ಸಾಲದೋ !
ಅಪ್ಪತಾನಾಕಾಶವಾಗಿರೆ
ನೀನೆ ನಿಜದೊಳು ಭೂಮಿಯು
ಬಾಳ ನಂದನದೊಳಗೆ ನೀವಿರೆ
ಬೇರೆ ಏತಕೆ ದೈವವು !?
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
