ಜನನದೊಳೆ ಹನನಮಿದೆ

ಘನ ಸೃಷ್ಟಿಯೇರಿಳಿತಕಲ್ಲೆ ಪರಿಹಾರಮಿದೆ
ಮನದ ದುಃಖಕೆ ಮನದೆ ಪರಿಹಾರಮುಂಟು !
ಕೊನೆಯೆಂಬುದಿರದಿದಕೆ ನಿತ್ಯ ಹೋರಾಟಮೈ
ಜನನದೊಳೆ ಹನನಮಿದೆ ಜಾಣಮೂರ್ಖ //

ಕೈವಾರ ತಾತಯ್ಯನವರ ಮಾತನ್ನು ನಮ್ಮ ಹಿರಿಯರೊಬ್ಬರು ಯಾವಾಗಲೂ ಹೇಳುತ್ತಿದ್ದರು. ಅದೇನೆಂದರೆ “ಕೋಟಿ ಸಮಸ್ಯಾಲುಕು ಶತಕೋಟಿ ಪರಿಹಾರುಮು” ಎಂದು. ಕೋಟಿ ಸಮಸ್ಯೆಗಳಿದ್ದರೆ ನೂರು ಕೋಟಿ ಪರಿಹಾರಗಳಿರುತ್ತವೆ ಎಂದು ! ಹಾಗೆಯೇ ಸೃಷ್ಟಿಯ ಏರಿಳಿತಗಳಿಗೆ ಅದೇ ಪರಿಹಾರವನ್ನು ಕಂಡುಕೊಳ್ಳುತ್ತದೆ. ಸಮತೋಲನ ಕಾಯ್ದುಕೊಳ್ಳುತ್ತದೆ. ನಾವೇನೂ ಪ್ರಕೃತಿಗಿಂತ ದೊಡ್ಡವರಲ್ಲ ! ಅದರ ಒಂದು ಭಾಗ ಅಷ್ಟೆ. ನಮ್ಮ ಮನದ ದುಃಖಕ್ಕೂ ಅಲ್ಲೇ ಪರಿಹಾರವೂ ಇದೆ. ನಾವು ಸ್ವೀಕರಿಸಲು ಸಿದ್ಧರಿರೋದಿಲ್ಲ ಅಥವಾ ಸಾವಧಾನವಾಗಿ ಚಿಂತಿಸುವ ವ್ಯವಧಾನವಿರೋದಿಲ್ಲ ಅಷ್ಟೆ. ಒಂದು ಮುಗಿಯುತ್ತಿದ್ದಂತೆ ಇನ್ನೊಂದು ! ಇದಕ್ಕೆ ಕೊನೆಯೆಂಬುದೇ ಇಲ್ಲ. ಸಮಸ್ಯೆಗೆ ಒಂದು ಹುಟ್ಟು ಹೇಗಿದೆಯೋ ಹಾಗೆಯೇ ಕೊನೆಯೂ ಇದೆ. ನಾವು ಸುಮ್ಮನೇ ಉದ್ವೇಗಕ್ಕೊಳಗಾಗುತ್ತೇವೆ ಅಷ್ಟೆ. ಜನನದ ಮರು ಕ್ಷಣವೇ ಸಾವಿಗೆ ಹತ್ತಿರವಾಗುತ್ತಿದ್ದೇವೆ ಎಂಬ ಸತ್ಯ ನಮಗೆ ಮನದಟ್ಟಾಗಬೇಕಿದೆ. ಅಲ್ಲವೇ ಗೆಳೆಯರೇ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)