ಮಾತಿಗೇಂ ಸೂತಕವೆ

ಮಾತಿಗೇಂ ಸೂತಕವೆ ಪ್ರೀತಿಯಾಭರಣಮಿರೆ !
ನೇತಿ ತಾಂ ದೈವ ತಾನಿತ್ತ ಉಡುಗೊರೆಯೊ
ಸ್ವಾತಿ ಮುತ್ತೇಕೆ ಬಿಡು ಸ್ಮಿತವಿರಲು ಮೊಗದಲ್ಲಿ
ಹೇತುವಿವು ಸಂತಸಕೆ ಜಾಣಮೂರ್ಖ //

ಕೆಲವರಂತೂ ಮಾತನಾಡಲು ತುಂಬಾ ಹಿಂದೇಟು ಹಾಕುತ್ತಾರೆ. ಮಾತಿಗೇನಾದರೂ ಸೂತಕವೇನು ? ಅನಂತ ಸೃಷ್ಟಿಯನ್ನೇ ಪ್ರೀತಿಸಲು ಭಗವಂತನು ಪ್ರೀತಿಯನ್ನೇ ನಮಗೆ ಆಭರಣವಾಗಿ ನೀಡಿದ್ದಾನೆ. ಪ್ರೀತಿಯ ಸ್ವರೂಪನೇ ತಾನಾಗಿದ್ದಾನೆ. ನಮ್ಮೋಳಗೇ ಈ ಪ್ರೀತಿಯ ಒಟ್ಟಿಗೆ ಸುಂದರ ಮುಗುಳುನಗೆಯ ಆಭರಣವನ್ನೂ ಇತ್ತಿದ್ದಾನೆ. ಮತ್ತಿನ್ನೇನು ಬೇಕು ! ಅನಂತ ಸೃಷ್ಟಿಯನ್ನು ಪ್ರೀತಿಯಿಂದ ಕಾಣಲು, ಮಾತನಾಡಲು , ಮುಗುಳುನಗಲು ನಮಗೇನು ತೊಂದರೆ ? ಆದರೆ ನಾವು ಆತ್ಮಸಂತೋಷಕ್ಕೆ ಹೇತುವಾದ ಇವುಗಳನ್ನು ಬಿಟ್ಟು ದ್ವೇಷ, ಅಸೂಯೆ , ಲೋಭ ಮೊದಲಾದ ನರಕದಲ್ಲೇ ನರಳುತ್ತೇವೆ. ಗಮನಿಸಿದ್ದೀರಾ ನೀವು! ಕೆಲವರಂತೂ ಮುಖವನ್ನು ಗಂಟಿಕ್ಕಿಕೊಂಡೇ ಇರುತ್ತಾರೆ. ನಕ್ಕರೇನಾದರೂ ನಷ್ಟವಿದೆಯೇನು ? ನೊಂದವರಿಗೆ ನಾಕು ಪ್ರೀತಿಯ ಮಾತು ನಾಕಸದೃಶವಲ್ಲವೆ? ಆದರೆ ನಾವು ಹೀಗೆ ಮಾಡೆವು. ಇದೊಂದು ದೊಡ್ಡ ವಿಪರ್ಯಾಸ ! ಅಲ್ಲವೇ ಗೆಳೆಯರೇ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)