ಬಾಳ್ಬಣ್ಣ

ಬೀಜ ಮಣ್ಣೊಳು ಮೊಳೆತು ಹೂಗೊಂಡು ಬೆಳೆದು ಮಿಗೆ
ಸಾಜದೊಳ್ಫಲವಿತ್ತು ನಲಿವಂತೆ ಮಾಯೆ
ಸೋಜಿಗದ ಬದುಕಿದುವೆ ಕೊನೆಗೆ ಮಣ್ಣಿದೆ ಮತ್ತೆ
ಸಾಜಮಿದೆ ಬಾಳ್ಬಣ್ಣ ಜಾಣಮೂರ್ಖ //

ಪ್ರಕೃತಿಯೊಂದಿಗೆ ಬದುಕನ್ನು ಬಹು ಸುಂದರವಾಗಿ ಸಮನ್ವಯಿಸಬಹುದು. ಈಗ ನೀವೇ ನೋಡಿ. ಬೀಜ ಮಣ್ಣುಸೇರುತ್ತದೆ ! ಅಲ್ಲಿಯೇ ಮೊಳಕೆಯೊಡೆಯುತ್ತದೆ ! ಕಾಂಡ ಕೊನೆ ಎಲ್ಲಾ ರೂಪುಗೊಳ್ಳುತ್ತದೆ. ಹೂಬಿಟ್ಟು , ಸಹಜವಾಗೇ ಫಲಬಿಟ್ಟು ತನ್ನ ಸಿಹಿಯ ಗುಣದಿಂದ ದೇವನಿಗೆ ನೈವೇದ್ಯವಾಗಿ , ಆ ನಂತರ ಮನುಷ್ಯನನ್ನು ತಣಿಸಿ ನಲಿಯುತ್ತದೆ.ತನ್ನ ಜನ್ಮವನ್ನು‌ಸಾರ್ಥಕ ಮಾಡೊಳ್ಳುತ್ತದೆ. ಸೋಜಿಗವೆಂದರೆ ನಾವೂ ಹೀಗೇನೆ ! ಅದು ಬಣ್ಣ ಬಣ್ಣದ ಹೂ ಬಿಟ್ಟು ನಲಿಯುತ್ತೆ ! ನಾವು ಬಣ್ಣ ಬಣ್ಣದ ಕನಸುಗಳನ್ನು ಕಟ್ಟಿಕೊಂಡು ನಲಿಯುತ್ತೇವೆ. ಕೊನೆಗೆ ಸಹಜವಾಗೇ ಎಲ್ಲಾ ಬಿಟ್ಟು ಮಣ್ಣು ಸೇರುತ್ತೇವೆ. ಇಷ್ಟೇ ಬದುಕು ! ಇದೇ ಬಾಳ್ಬಣ್ಣ ! ಗೆಳೆಯಾ, ನೂರು ವರ್ಷ ಆಯಸ್ಸು ಕೊಟ್ಟಿದ್ದಾನೆ ಭಗವಂತ. ಇಷ್ಟರಲ್ಲಿ ಏನಾದರೂ ಸಾಧಿಸು ಅಂತ. ಮೇಲೆ ಕೂತು ಎಲ್ಲಾ ನೋಡ್ತಾ ಇದಾನೆ. ಏನು ನಮ್ಮ ಸಾಧನೆ ಅಂತ ಆತ್ಮಾವಲೋಕನ ಮಾಡ್ಕೋಬೇಕಾದವರು ನಾವು. ಮುಖ್ಯಪ್ರಾಣ, ಮೂಲಗುರು , ದೇವನನ್ನು ಮರೆಯಬಾರದಷ್ಟೆ. ಅಲ್ಲವೇ ಗೆಳೆಯರೇ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)