ಬಿತ್ತಿದೆನು ನಾ ನೀರ ಕಟ್ಟಿದೆನು ನಾನೊಡ್ಡ
ಎತ್ತಿದೀ ಹೂವೆನ್ನ ತೋಟದ್ದೆ ಎನದೆ !
ಸುತ್ತಿ ಸೂಸುವ ಗಂಧವಾರೆಂದು ಅರಿತು ನೀ
ನೆತ್ತರದಿ ಬದುಕೇಳೊ ಜಾಣಮೂರ್ಖ //
‘ನಾನು’ ಎನ್ನೋದು ನಮ್ಮಲ್ಲಿ ಎಷ್ಟು ಘನೀಭವಿಸಿದೆ ಎಂದರೆ ಬೀಜ ಬಿತ್ತಿದವನು ‘ನಾನು’ , ನೀರ ಕಟ್ಟಿದವನು ‘ನಾನು’ ಬಿಡಿಸಿ ತಂದಿರುವ ಈ ಹೂವೆನ್ನ ತೋಟದ್ದೇ ! ಎನ್ನುತ್ತೇವೆ. ಸರಿ ಬಿಡಿ ಎಲ್ಲಕ್ಕೂ ಕಾರಣ ಕರ್ತರು ನಾವಾದರೆ ಹೂವಿನೊಳಗಡಗಿದ್ದು ,ಸುಳಿದು ಸೂಸಿ ಜಗವನ್ನೆ ಸಗ್ಗವಾಗಿಸುವ ಸೌಗಂಧ ಯಾರದ್ದು !? ದುಂಬಿ ಹೀರುವ ಮಕರಂದವಾರದ್ದು !? ಗಿಡಕೆ ಸತ್ವವಿತ್ತ ನೀರೆತ್ತಣದು ? ಸತ್ವವಿತ್ತವರಾರು !? ಬೆಳೆದ ಫಲದೊಳಗೆ ಸಿಹಿಯನಿಟ್ಟವರಾರು !? ಅಷ್ಟಕ್ಕೂ ಆ ಹೂವಿನಲ್ಲಿ ನನ್ನದೆಂದು ತೋರಲು ಇರುವ ಒಂದು ಸಣ್ಣ ಕುರುಹಾದರೂ ಏನಿದೆ ! ಈ ತೆರನಾದ ಚಿಂತನೆಗಳು ಮೂಡಿದಾಗ ನಾನೆಂಬುದು ಮಾಯವಾಗುತ್ತೆ. ಇಂತಹಾ ಎತ್ತರದಲ್ಲಿ ಚಿಂತಿಸಿ ನೆಪಮಾತ್ರನು ನಾನೆಂಬ ಅರಿವಿನಲ್ಲಿ ಕರ್ಮವೆಸಗುತ್ತಾ ಸಾಗುವವನೇ ನಿಜವಾದ ಜ್ಞಾನಿ ! ಅದೇ ನಿಜವಾದ ಅರಿವು ! ಅಲ್ಲವೇ ಗೆಳೆಯರೇ !?
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
