ಪಾಳಿ ಬರುವನಕ ತಾಳ್

ನಾಳೆಗಳನಿಟ್ಟವನು ಕೂಳಿಗಿಟ್ಟಿಹ ದಾರಿ
ಪಾಳಿ ಬರುವನಕ ತಾಳ್ ಗೋಳಾಟವೇಕೆ ?
ದಾಳವಿಹುದೆಂತೊ ವಿಧಿಯಾಟವರಿತವರಾರು ?
ತಾಳು ಉಬ್ಬೆಗವೇಕೆ ಜಾಣಮೂರ್ಖ//

ನಾವುಗಳು ಪ್ರತಿಯೊಬ್ಬರೂ ಈ ಮುಕ್ತಕದ ಆಳಕ್ಕಿಳಿದು ಬಿಟ್ಟರೆ ಜಗತ್ತು ರಾಮರಾಜ್ಯವಾಗಿಬಿಡುತ್ತೆ. ಆದರೆ ಆಳಕ್ಕಿಳಿಯಬೇಕಷ್ಟೆ. ಓ, ಗೆಳೆಯ ವಿಧಿ ನಿನಗೆ ನಾಳೆಯನ್ನು ಕೊಟ್ಟಿದೆ ಎಂದ ಮೇಲೆ ನಿನಗೊಂದು ಬದುಕಿನ ದಾರಿಯನ್ನು ಕೊಟ್ಟೇ ಇರುತ್ತದೆ. ಬದುಕು ಬಂದಂತೆ , ದಾರಿ ಕೊಟ್ಟಂತೆ ನಡೆಯೋಣ. ಕಿಂಚಿತ್ ಪ್ರಯತ್ನವಿರಲಿ. ಆದರೆ ಅದಕ್ಕಾಗಿ ಗೋಳಾಡುವುದಾದರೂ ಏಕೆ ? ವಿಧಿಯ ಎಣಿಕೆಯೆಂತೋ ಅರಿತವರು ಯಾರು ? ಸ್ವಯಂ ಶ್ರೀಮನ್ನಾರಾಯಣನೇ ವಿಧಿಯ ದಾಳಕ್ಕೆ ತುತ್ತಾಗಲಿಲ್ಲವೇ !? ಇನ್ನು ನಾವು ನೀವು ತಪ್ಪಿಸಿಕೊಳ್ಳಲಾದೀತೆ !? ಸುಮ್ಮನೇ ಉದ್ವೇಗ ಪಡುವುದಾದರೂ ಏಕೆ ? ಉದ್ವೇಗ ಪಟ್ಟಾಕ್ಷಣ ವಿಧಿ ಬದಲಾಗುವುದೇನು ? ಓ ಗೆಳೆಯ ಒಳಿತನ್ನು ಬಯಸು , ಒಳಿತನ್ನೇ ಮಾಡು, ಬದುಕಿನಲ್ಲಾಗ ಒಳಿತೇ ಆಗುವುದು. ಇದರಲ್ಲಿ ಸಂಶಯವಿಲ್ಲ. ತಾಳ್ಮೆಯಿಂದಿರು. ಇಲ್ಲಿ ಆಗುವುದೆಲ್ಲಾ ಒಳ್ಳೆಯದಕ್ಕೇ ಆಗುತ್ತದೆ. ಎಲ್ಲರಿಗೂ ಬಂದಂತೆ ನಮಗೂ ನಾಳೆ ಪಾಳಿ ಬಂದೇ ಬರುತ್ತದೆ. ಮತ್ತೆ ಉಬ್ಬೆಗವಾದರೂ ಏಕೆ ! ಅಲ್ಲವೇ ಗೆಳೆಯರೇ ?!

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)