ಬಾಳ್ವೆಂದರಿದೆಯೇನೊ

ಬೀಳ್ವುದೇನೇಳ್ವುದೇನೀಸೀಸಿ ಸೋಲ್ವುದೇ
ನಾಳ್ವಂತ ಪರಿಯುಮೇಂ ಪೇಳ್ವ ಪಾಂಗೆಂತು !
ತಾಳ್ವಿಕೆಯ ಆಳದೊಳಗೇಂ ಸ್ವಾರ್ಥದಾ ಸೆಳೆತ
ಬಾಳ್ವೆಂದರಿದೆಯೇನೊ ಜಾಣಮೂರ್ಖ //

ಸ್ನೇಹಿತರೇ , ಗುರುವಿತ್ತ ಈ ನುಚ್ಚಿನ ನುಡಿಯನ್ನು ಒಮ್ಮೆ ಗಂಭೀರವಾಗಿ ಪರಿಗಣಿಸಿ. ನಿಮ್ಮನ್ನೊಮ್ಮೆ ನೀವೇ ನೋಡಿಕೊಳ್ಳಿ ! ಬದುಕಿನಲ್ಲಿ ಒಮ್ಮೆ ಏಳುತ್ತೇವೆ , ಮತ್ತೊಮ್ಮೆ ಬೀಳುತ್ತೇವೆ. ಈ ಬಾಳ ಸಾಗರದಲ್ಲಿ ಈಸೀ ಈಸೀ ಸೋಲುತ್ತೇವೆ. ಸೋತರೂ ರಕ್ತಗುಣ ! ನಿರಂಕುಶತ್ವ , ಅಹಂಕಾರ ಮಾತ್ರ ಹೋಗೋದೇ ಇಲ್ಲ. ನಮ್ಮ ಮಾತಿನ ಗತ್ತು ಗೊತ್ತಿಲ್ಲದೆಯೇ ನಮ್ಮಲ್ಲಿರುವ ಅಹಂಕಾರವನ್ನು ತೋರಿಸುತ್ತಿರುತ್ತದೆ. ಕೆಲವರನ್ನು ನೋಡಿ ! ಅವರಿಗೆಂತಹಾ ತಾಳ್ಮೆ ! ಆ ತಾಳ್ಮೆಯ ಆಳದಲ್ಲಿ ಎಂತಹಾ ಸ್ವಾರ್ಥದ ಸೆಳೆತ ಇರುತ್ತೆ ಅಂದರೆ ! ಅದು ನಮ್ಮ ವ್ಯಕ್ತಿತ್ವದ ಉದಾತ್ತತೆಯನ್ನು ಬಿರುಗಾಳಿಯು ತೂರಿ ಬಿಸಾಡುವ ತರಗೆಲೆಯಂತೆ ತೂರಿಬಿಡುತ್ತದೆ. ಎಂತಹಾ ಸ್ವಾರ್ಥವಿದು ! ಇತ್ತೀಚೆಗೆ ಇಂತಹಾ ಸ್ವಾರ್ಥಕ್ಕೆ ‘ಸ್ವಾಭಾವಿಕ ಇದು ಬಿಡಿ’ ಎಂಬ ಸ್ವೀಕಾರ ಬೇರೆ !! ಇದೇಯೇನು ಬಾಳೆಂದರೆ !? ಅಲ್ಲ ಕಣಯ್ಯ ಗೆಳೆಯ , ಇದಲ್ಲ. ಅದು ನುಡಿಯನ್ನು ಮೀರ್ದುದು. ಅನುಭವದಿಂದಲೇ ಅರಿತು ಬದುಕಿನಲ್ಲಿ ಪಕ್ವವಾಗಬೇಕು. ಆಗದಿದ್ದರೆ ಎಳಸಾಗಿಯೇ ಪೂರಾ ಬದುಕನ್ನು ಕಳೆದು “ನಾನೂ ಬದುಕಿದ್ದೆ” ಅಂತ ಬದುಕುತ್ತೇವೆ ಅಷ್ಟೇ. ಅದೂ ಒಂದು ಸ್ವಾರಸ್ಯವೇನು ? ಬದುಕಿನ ಆಳಕ್ಕಿಳಿದು ಇದರ ಉದ್ದೇಶ , ಆಂತರ್ಯವನ್ನರಿತು ಬದುಕೋದಿದೆಯಲ್ಲಾ ! ಅದು ನಿಜವಾದ ಬದುಕು. ಅಲ್ಲವೇ ಗೆಳೆಯರೇ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)