ರಾಮನೆನ್ನುತ ಕಡಲ ಮಳಲೊಳಾಡುತಲೆದ್ದು
ರಾಮಸೇತುವ ಕಟ್ಟಿ ಧನ್ಯವಾಯ್ತಳಿಲು !
ಭೀಮಕಾಯವದೇಕೆ ನೇಮದಿಂ ಗೈಯ್ದೊಡದು
ರಾಮಸಖ್ಯಕೆ ಹೇತು ಜಾಣಮೂರ್ಖ //
ಶ್ರೀರಾಮ ಸೇತುವೆಯನ್ನು ಕಟ್ಟುವಾಗ ಅಳಿಲೊಂದು ನೀರಿನಲ್ಲಿ ನೆಂದು ಮರಳಿನಲ್ಲಿ ಆಡಿ ತನಗಂಟಿದ ಮರಳಿನ ಕಣಗಳನ್ನು ತಂದು ಬಂಡೆಗಳ ಸಂದುಗಳಿಗೆ ಕೊಡವಿ ತನ್ನದೇ ಆದ ಪರಿಯಲ್ಲಿ ಸೇವೆಗೈಯ್ಯುತ್ತಿತ್ತು. ರಾಮಸೇತುವಿನ ನಿರ್ಮಾಣ ಕಾರ್ಯದಲ್ಲಿ ತನ್ನನ್ನು ಹೀಗೆ ಅರ್ಪಿಸಿಕೊಂಡಿತ್ತು. ಶ್ರೀರಾಮನಾದರೋ ಅದರ ಸೇವೆಯನ್ನು ಕಂಡು ಅತ್ಯಂತ ಪ್ರೇಮದಿಂದ ಅದರ ಮೈದಡವಿದ. ರಾಮನ ಕೈಬೆರಳ ಗೆರೆಗಳು ಅದರ ಬೆನ್ನ ಮೇಲೆ ಮೂಡಿದವು. ಅದರ ಸೇವೆ ಘನವಾಗಿತ್ತು. ಅಳಿಲಸೇವೆ ಎಂದೇ ಇಂದಿಗೂ ಪ್ರಸಿದ್ಧವಾಗಿದೆ. ಭೀಮಕಾಯವಿದ್ದರೇನು ನೇಮದಿಂದ , ನಿಷ್ಠೆಯಿಂದ ಕಾರ್ಯವೆಸಗದ ಮೇಲೆ !? ವ್ಯರ್ಥವಷ್ಟೆ. ನಿಷ್ಠೆಯಿದ್ದರೆ ಅಲ್ಲಿ ಜೀವದೇವರ ಸಮಾಗಮವಾಗುತ್ತದೆ. ಅದರ ಆನಂದವೇ ಬೇರೆ. ಅದಕ್ಕೆ ಮೇಲಿನ ಈ ಪೌರಾಣಿಕ ಉಲ್ಲೇಖವೇ ಸಾಕ್ಷಿ. ಅಲ್ಲವೇ ಗೆಳೆಯರೇ ?
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
