ಯಜ್ಞ

ಯಜ್ಞದಿ ಹವಿರ್ಭಾಗ ಪಡೆದು ಹರಸಲು ಸುರರು
ಅಜ್ಞಾನವಳಿದು ಧರೆ ಕಂಗೊಳಿಸಿತಂದು !
ಸುಜ್ಞಾನದಿಂ ಹಸಿವಿಗನ್ನವಿಕ್ಕದೆ ಹವಿಯು
ಧರೆಯ ಪೊರೆಯದೆಯಜ್ಞ ಜಾಣಮೂರ್ಖ //

ಹಿಂದಿನ ಯುಗಗಳಲ್ಲಿ ಋಷಿಗಳು, ಮುನಿಪುಂಗವರು ಮಾಡುತ್ತಿದ್ದ ಯಜ್ಞಯಾಗಾದಿಗಳ ಹವಿರ್ಭಾಗ (ಹವಿಸ್ಸು)ವನ್ನು ಪಡೆದು ಅಷ್ಠದಿಕ್ಪಾಲಕರಾದಿಯಾಗಿ ಸಮಸ್ತ ದೇವತೆಗಳೂ ಸಂತುಷ್ಟತಾಗಿ ಹರಸುತ್ತಿದ್ದರು. ಅದರ ಪರಿಣಾಮವಾಗಿ ಇಳಗೆ ಮಳೆಬೆಳೆಯಾಗಿ ಸಮೃದ್ಧಿಯಿಂದ ಜನ ಬದುಕುತ್ತಿದ್ದರು. ಯಜ್ಞಯಾಗಾದಿಗಳ ಫಲವಾಗಿ ಪ್ರಕೃತಿ ಶುದ್ಧವಾಗಿಯೂ , ನಿರ್ಮಲವಾಗಿಯೂ ಇತ್ತು. ಮನಸ್ಸಿನ ಅಜ್ಞಾನ ದೂರವಾಗಿ ಧರೆಯೇ ಕಂಗೊಳಿಸಿತ್ತು. ಭೂತಾಯಿ ಇಂತಹಾ ಮಕ್ಕಳನ್ನು ಪಡೆದ ನಾನು ಧನ್ಯೆ ಎಂದು ನೆಮ್ಮದಿಯಿಂದಿದ್ದಳು. ಇಂದು ! ಯಾಗ, ಯಜ್ಞ , ಹವಿಸ್ಸುಗಳ ಮಾತು ಹಾಗಿರಲಿ , ಕಡೇ ಪಕ್ಷ ಪ್ರಕೃತಿಯನ್ನು ರಕ್ಷಿಸಬೇಕೆಂಬ ಕಿಂಚಿತ್ ಜಾಗೃತಿಯೂ ನಮ್ಮಲ್ಲಿಲ್ಲವಾಗಿದೆ. ಇನ್ನು ದೇವತೆಗಳಾಗಲಿ , ಅಷ್ಠದಿಕ್ಪಾಲಕರುಗಳಾಗಲಿ ನಾವು ಹವಿಸ್ಸು ಕೊಡಲೆಂದು ಎಂದೂ ಕಾಯುತ್ತಾ ಕುಳಿತುಕೊಳ್ಳುವುದಿಲ್ಲ. ಅವರ ಕೆಲಸವನ್ನು ಅವರು ನಿಸ್ಪೃಹರಾಗಿ ಮಾಡುತ್ತಾರೆ, ಮಾಡುತ್ತಿದ್ದಾರೆ ಬಿಡಿ . ಅದಕ್ಕೇ ಅವರನ್ನು ದೇವತೆಗಳೆನ್ನುವುದು ! ಹಸಿದವರಿಗೆ ಒಂದಿಷ್ಟು ಅನ್ನ ನೀಡೋಣ ಅದು ಈ ಕಲಿಯುಗದಲ್ಲಿ ಹವಿಸ್ಸಿಗೆ ಸಮ ! ಮಾಲಿನ್ಯದಿಂದ ಭೂತಾಯಿಯನ್ನು ರಕ್ಷಿಸೋಣ ಭೂಮಾತೆಯ ಮಕ್ಕಳಾಗಿ ಇದು ನಮ್ಮ ಕರ್ತವ್ಯ.ಸ್ವಸ್ಥಿತಿ ಕಾಯ್ದುಕೊಂಡು ಮುಂದಿನ ಮಾಲಿನ್ಯ ನಿಲ್ಲಿಸಿದರೆ ಸಾಕು. ಆ ತಾಯಿ ಧನ್ಯೆ ! ಅಖಂಡ ಸೃಷ್ಟಿಯನ್ನು ಪ್ರೀತಿಯಿಂದ ಕಂಡು ಅದರೊಟ್ಟಿಗೆ ಬದುಕಬೇಕಿದೆ. ಬೇರೆಲ್ಲವೂ ಸುಮ್ಮನೆ ಅಷ್ಟೆ. ಅಲ್ಲವೇ ಗೆಳೆಯರೇ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)