ಹನಿಸು ಬಾ ಪ್ರೀತಿಯನು

ದಿನದಿನವು ಯುದ್ಧಕೇಳ್ಮನದ ರಣರಂಗದೊಳು
ತನುತೊತ್ತು ಧನವೆ ಗುರಿ ನನ್ನಿಯೂಳಿಗವೊ !
ಮನಶೈತ್ಯದಾ ಹನನ ಕೇಳುವವರಾರಿಲ್ಲ !
ಹನಿಸು ಬಾ ಪ್ರೀತಿಯನು ಜಾಣಮೂರ್ಖ//

ಸ್ನೇಹಿತರೇ , ನನಗೆ ನಿಜಕ್ಕೂ ಈಗಿನ ಪರಿಸ್ಥಿತಿಯನ್ನು ನೋಡಿ ಭಯವೂ , ಗಾಬರಿಯೂ ಆಗುತ್ತಿದೆ. ನಮ್ಮ ಹಪಹಪಿಕೆ , ಅತೃಪ್ತಿ , ಲೋಭವು ದಿನೇ ದಿನೇ ವಿಕೃತವಾಗುತ್ತಿವೆ. ಸ್ವಾರ್ಥ ಮೇರೆಮೀರುತ್ತಿದೆ. ಧನಸಂಪಾದನೆಯೇ ಗುರಿಯಾಗಿದೆ. ಪ್ರಶಾಂತವಾದ ಮನನಂದನವು ರಣರಂಗವಾಗಿದೆ ! ವಿಕೃತ ಆಲೋಚನೆಗಳ ತಾಣವಾಗಿದೆ. ನಿರಂತರವಾಗಿ ಶರೀರವನ್ನು ಶೋಷಿಸುತ್ತಿದ್ದೇವೆ ! ದೇಹರಥಕ್ಕೆ ಹುಚ್ಚು ಸಾರಥಿಯೊಡನೆ ಮನಬಂದಂತೆ ಸಾಗುವ ದುರ್ಗತಿ ಒದಗಿದೆ. ಮನದ ಸಂತೋಷದ ಕಗ್ಗೊಲೆಯಾಗುತ್ತಿದೆ ! ಸತ್ಯವು ಊಳಿಗದ ಆಳಂತೆ ಕೊರಗುತ್ತಿದೆ ! ಈ ಯುದ್ಧ ದಿನದಿಂದ ದಿನಕ್ಕೆ ತೀವ್ರ ಸ್ವರೂಪ ಪಡೆದುಕೊಳ್ಳುತ್ತಿರುವುದು ತುಂಬಾ ಆತಂಕಕಾರಿಯಾಗಿದೆ. ಓ ಗೆಳೆಯ , ಪ್ರೀತಿಯ ಸಿಹಿಸಿಂಚನವನ್ನು ಹನಿಸಿ ಭೂಮಿ ತಾಯಿಗೆ ತಂಪೆರೆಯಬೇಕಿದೆ. ಭೂತಾಯಿ ಮುನಿಯುತ್ತಿದ್ದಾಳೆ. ಮುನಿದೊಮ್ಮೆ ಕೆರಳಿ ಮಾನವ ಸಂತತಿಯನ್ನೇ ನಾಶಗೈಯ್ಯುವ ಮುನ್ನ ಇನ್ನಾದರೂ ಎಚ್ಚೆತ್ತೊಳ್ಳಯ್ಯಾ ! ಬನ್ನಿ ಪ್ರೀತಿಯ ನಂದಾದೀಪವನ್ನು ಬೆಳಗೋಣ !

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)