ಬಿತ್ತರದ ಕಡಲು ಬಲು ವಿಸ್ಮಯದ ಒಡಲಂತೆ
ಮತ್ತದರ ಆಳದೊಳಗೆಂತ ಬಡಬಾಗ್ನಿ !
ಸುತ್ತೇಳು ಲೋಕದೊಳಗಂತೆ ಸತ್ಯವೊ ಜಾಣ !
ಮತ್ತೆ ಮೇಲೆಮ್ಮ ಬಾಳ್ ಜಾಣಮೂರ್ಖ //
ಸಮುದ್ರವನ್ನು ಎಲ್ಲರೂ ನೋಡಿದ್ದೇವಲ್ಲಾ ! ಅದೆಷ್ಟು ಅಗಾಧ ! ಗಂಭೀರ ! ಶಾಂತ ! ರಮಣೀಯ ! ರೌದ್ರ ! ಭಯಾನಕ ! ಅದ್ಭುತ ! ಅಬ್ಬಾಬ್ಬಾ , ಯಾವ ರೀತಿಯಲ್ಲಿ ಅದನ್ನು ಬಣ್ಣಿಸೋದು ! ಮೇಲೆ ತಣ್ಣಗಿನ ನೀರು ! ಒಡಲೊಳಗೆ ಬಡಬಾಗ್ನಿ ! ಆಳಕ್ಕೆ ಯಾರೂ ಹೋಗರು ! ನಮ್ಮ ಊಹೆಯನ್ನು ಮೀರಿದ ಬೆಂಕಿ ! ಎಂತಹಾ ವಿಚಿತ್ರ ಈ ದಿವ್ಯ ಭವ್ಯ ಸುಂದರ ಪ್ರಕೃತಿ ! ದೈವಸೃಷ್ಟಿ ! ಹಾಗೆಯೇ ಸುತ್ತೇಳು ಲೋಕದಲ್ಲಿರುವ ಸತ್ಯ ! ಅದರ ಮೇಲೆ ನಮ್ಮ ಬದುಕು ಅರಳುತ್ತಿದೆ. ಆದರೆ ಸತ್ಯದ ಆಳವನ್ನು ಯಾರೂ ನೋಡುತ್ತಿಲ್ಲ ! ಅಲ್ಲಿಗೂ ಯಾರೂ ಹೋಗರು ! ಸತ್ಯದ ಜೊತೆಗೇ ಬದುಕಾದರೂ ಸತ್ಯವನ್ನು ಮಾತ್ರ ಯಾರೂ ಕಾಣರು ! ಅದರೆಡೆಗೆ ಸಾಗುವ ಧೈರ್ಯ ಮಾಡರು ! ಮೇಲಿನ ಮಿಥ್ಯಕ್ಕೇ ಮನಸೋಲುವರು ! ಇದು ವಿಚಿತ್ರ ಆದರೂ ಸತ್ಯ ! ಅಲ್ಲವೇ ಗೆಳೆಯರೇ !?
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
