ನೋವುಂಡು ನಗುವವಗೆ ನೋವೆ ಈ ಜಗದಲ್ಲಿ
ಭಾವನೆಗೆ ಬೆಲೆಯಿರದ ಬೆಂಗಾಡಿನಲ್ಲಿ !
ದೇವನೇಕವತರಿಸಿ ಬಾರನೋ ಕಾಣೆ ನಾ
ಕಾವಂಗು ಕಟ್ಟಳೆಯೆ ಜಾಣಮೂರ್ಖ//
ಇದೊಂತರಾ ವಿಚಿತ್ರ ಪ್ರಪಂಚ ! ಯಾರು ಸತ್ಯ ಧರ್ಮ ಅಂತ ನೋವು ತಿನ್ನೋದಕ್ಕೆ ಸಿದ್ಧನಿರುತ್ತಾನೋ ಅವನಿಗೆ ನೋವುಗಳ ಸರಮಾಲೆ ! ನೋವುಣ್ಣುವವನು ಸದಾ ನೋವನ್ನು ಸಹಿಸುತ್ತಾ ಹೊರಗೆ ನಗುತ್ತಾ ಒಳಗೆ ದುಃಖಿಯೇ ಆಗಿರುತ್ತಾನೆ. ಆರ್ದ್ರವಾದ ಮೃದು ಮನೋಭಾವನೆಗಳಿಗೆ ಇಲ್ಲಿ ಬೆಲೆಯೇ ಇಲ್ಲ ! ಶುಷ್ಕವಾದ , ಬರಡಾದ ಬೆಂಗಾಡಿದು ! ಅನ್ಯಾಯ ಗೈದವನು ರಾಜಾರೋಷವಾಗಿ ವಿಕೃತ ಸಂತೋಷದಲ್ಲಿ ಬದುಕುತ್ತಿರೋ ಉದಾಹರಣೆಗಳು ನಮ್ಮ ಕಣ್ಣಮುಂದೆಯೇ ಇವೆ ! ಹೇಳುವವರೂ ಕೇಳುವವರೂ ಇರದ ಸರ್ವಾಧಿಕಾರಿ ಪ್ರಪಂಚವಾಗಿದೆ ! ಇಷ್ಟಾದರೂ ದೇವನೇಕವತರಿಸಿ ಬರುತ್ತಿಲ್ಲ ಎಂಬುದೇ ಯಕ್ಷಪ್ರಶ್ನೆ ! ಸಂಭವಾಮಿ ಯುಗೇ ಯುಗೇ ಅಂತ ಪ್ರಮಾಣಗೈದವನು ತಾನೇ ಅವನು !! ಮತ್ತೇಕೆ ತಡ ಮಾಡುತ್ತಿದ್ದಾನೋ ಕಾಣೆ! ಅವನ ಲೋಕದಲ್ಲೂ ಏನಾದರೂ ಕಾನೂನು ಕಟ್ಟಳೆಯ ತೊಡಕಿರಬಹುದೇ !? ಕಾವ ದೇವನಿಗೂ ಕಟ್ಟಳೆಯ ತೊಡಕೇ !? ಅವನೇ ಬಂದು ಉತ್ತರಿಸಬೇಕು. ಸತ್ಯದ ಪುನರುತ್ಥಾನವಾಗಬೇಕು ! ಅಸತ್ಯ , ಅನ್ಯಾಯದ ಘಾಟಿನಿಂದ ಮಲಿನಗೊಂಡ ಜಗತ್ತು ಭಗವಂತನ ಅವತಾರದಿಂದ ಶಾಂತವಾಗಬೇಕಿದೆ ! ಅಲ್ಲವೇ ಗೆಳೆಯರೇ !?
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
