ಬಾಳ ವಿಶ್ವವಿದ್ಯಾಲಯ

ಏಳೇಳು ವಿಶ್ವವಿದ್ಯಾಲಯದಿ ಕಲಿತೊಡೇಂ
ಬಾಳಿನೇಳ್ಬೀಳ್ಗಳಿಗೆ ಅಳುಕಿದಾ ಮೇಲೆ
ಬಾಳ ವಿದ್ಯಾಲಯದಿ ಕಲಿವ ಪಾಠವೆ ಮೇಲು
ತಾಳಿಕೆಯ ಪಾಠವದು ಜಾಣಮೂರ್ಖ//

ಓದಿಗೆ ಕೊನೇನೇ ಇಲ್ಲ ಬಿಡಿ. ಎಷ್ಟು ಬೇಕಾದ್ರೂ ಓದಬಹುದು. ಬೇರೆ ಬೇರೆ ವಿಶ್ವವಿದ್ಯಾಲಯಗಳಲ್ಲಿ ಹತ್ತಾರು ಪದವಿಗಳನ್ನು ಪಡೆದು ಪದವೀಧರರಾಗುವ ನಾವು ಬದುಕಿನ ಏಳು ಬೀಳುಗಳನ್ನು ಕಂಡು ತುಂಬಾ ಹೆದರುತ್ತೇವೆ. ಹಾಗಾಗಿಬಿಟ್ಟರೆ ! ಹೀಗಾಗಿಬಿಟ್ಟರೆ ಅಂತ ಗಾಬರಿ ಪಡುತ್ತೇವೆ, ಏನೇನೋ ಕಲ್ಪಿಸಿಕೊಳ್ಳುತ್ತೇವೆ ! ಆದರೆ ಸತ್ಯ ಏನು ಗೊತ್ತೆ ಗೆಳೆಯರೇ !? ವಾಸ್ತವ ಬದುಕು ನಮ್ಮ ಕಲ್ಪನೆಯಷ್ಟು ಕಠಿಣವಾಗಿರೋದಿಲ್ಲ ! ಸ್ವಲ್ಪ ಯೋಚಿಸಿ ! ಹೌದು ತಾನೆ !? ಈ ಬದುಕೆಂಬುದು ಉಳಿದೆಲ್ಲ ವಿಶ್ವವಿದ್ಯಾಲಯಗಳಿಗಿಂತ ಒಂದು ದೊಡ್ಡ ವಿಶ್ವವಿದ್ಯಾಲಯ ! ತಾಳ್ಮೆಯೇ ಇಲ್ಲಿನ ಪಾಠ ! ಬಾಳ ಕಷ್ಟಗಳೇ ಪರೀಕ್ಷೆ ! ಲಿಖಿತ ಒರೆಗಳಿಲ್ಲ ಇಲ್ಲಿ , ಬರೀ ಪ್ರಾಯೋಗಿಕ ಪರೀಕ್ಷೆ ಮಾತ್ರ ! ಇಂದಿನ ವಿಶ್ವವಿದ್ಯಾಲಯಗಳಲ್ಲಿ ಕಲಿತು ಹತ್ತಾರು ಪದವಿಗಳನ್ನು ಪಡೆದರೂ ಬದುಕಿನಲ್ಲಿ ಅನುತ್ತೀರ್ಣರಾಗುತ್ತಿರುವ ಎಷ್ಟೋ ಜನರನ್ನು ನೋಡುತ್ತಿದ್ದೀವಿ ಅಲ್ಲವೇ !? ಅದಕ್ಕೇ ನಮ್ಮ ಹಿರಿಯರು ಹೇಳೋರು -“ಓದು ಒಕ್ಕಾಲು ಬುದ್ಧಿ ಮುಕ್ಕಾಲು ” ಅಂತ. ಎಷ್ಟು ಸತ್ಯ ಅಲ್ಲವೇ ಈ ಮಾತು !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)